ဘာမဆိုသင်ယူဖို့ အကောင်းဆုံးနည်းလမ်းကတော့ အလုပ်သင်အနေနဲ့ စတင်ခြင်းပါပဲ။ ဆရာဝန်တွေ၊ စားဖိုမှူးတွေ၊ လက်သမားတွေ၊ ဆံပင်ညှပ်ဆရာတွေနဲ့ တခြားပညာရှင်များစွာဟာ သူတို့ရဲ့ကျွမ်းကျင်မှုကို အမှန်တကယ်တတ်မြောက်ဖို့အတွက် စာတွေ့သဘောတရားတွေကို သင်ယူပြီးနောက် "ဆရာသခင်" တွေဆီမှာ လက်တွေ့လိုက်လံသင်ယူကြရပါတယ်။ သီအိုရီအရ သင်ယူခြင်းဟာ လက်တွေ့လုပ်ဆောင်ခြင်းနဲ့ အရမ်းကွာခြားတယ်ဆိုတာကို ကျွန်ုပ်တို့အားလုံး သိကြပါတယ်။ ဆုတောင်းခြင်းနဲ့ပတ်သက်လာရင်လည်း ကျွန်ုပ်တို့ဟာ ဆုတောင်းခြင်းရဲ့ ဆရာသခင်တစ်ဦးကို ရှာဖွေဖို့လိုအပ်ပါတယ်။

ဒီတော့ ဆုတောင်းခြင်းရဲ့ ဆရာသခင်ကို လေ့လာပြီး ဘယ်လိုဆုတောင်းရမလဲဆိုတာကို ရှာဖွေကြည့်ကြရအောင်။

ဆုတောင်းခြင်း၏ ဆရာသခင် - ယေရှု

ပန်းချီဆွဲတာ၊ ချက်ပြုတ်တာ ဒါမှမဟုတ် ကွန်ဖူးကစားတာပဲဖြစ်ဖြစ်၊ အဲဒီအရာတွေကို သင်ဟာ ကြည့်ရှုခြင်း၊ အတုယူခြင်း၊ ဖတ်ရှုခြင်းနဲ့ ကိုယ်တိုင်လေ့ကျင့်ခြင်းအားဖြင့် သင်ယူရပါတယ်။ ဆုတောင်းခြင်းလည်း ထိုနည်း၎င်းပါပဲ။ ဆုတောင်းခြင်းအကြောင်း တစ်ခုခုသင်ယူချင်ရင်၊ သင်ဟာ 'ဆရာသခင်' ယေရှုကို ကြည့်ရှုရမှာ ဖြစ်ပါတယ်။ ယေရှုဟာ ဘုရားသခင်ရဲ့သားတော်ဖြစ်တဲ့အတွက် ဒီမြေကြီးပေါ်မှာရှိနေစဉ် ဘုရားသခင်နဲ့ အထူး "ဖုန်းလိုင်း" ရှိတယ်လို့ သင်ထင်ကောင်းထင်နိုင်ပါတယ်။ ဒါပေမဲ့ ယေရှုဟာ ကျွန်ုပ်တို့ရဲ့ကယ်တင်ရှင်နဲ့ သခင်ဖြစ်ဖို့သာမက၊ ကျွန်ုပ်တို့ရဲ့စံနမူနာ ဖြစ်ဖို့လည်း ကြွလာခဲ့တာပါ။ ဒါကြောင့် ဆုတောင်းခြင်းဟာလည်း ဒီမြေကြီးပေါ်က သူ့ရဲ့ဘဝမှာ အရေးပါတဲ့ အစိတ်အပိုင်းတစ်ခုအဖြစ် ပါဝင်ခဲ့ပါတယ်။ ယေရှုဆီကနေ ဆုတောင်းခြင်းအကြောင်း သင်အများကြီးသင်ယူနိုင်ပါတယ်။ ယေရှုဟာ သူ့ရဲ့ကိုယ်ပိုင်ဆုတောင်းခြင်းဘဝအကြောင်းကို ထိုးထွင်းသိမြင်မှုတွေကို ဝေငှပေးလေ့ရှိပါတယ်။ သူက သင့်ကို အကြံဉာဏ်တွေပေးတယ်၊ စိန်ခေါ်တယ်၊ သင်ကိုယ်တိုင် စကားလုံးတွေရှာမတွေ့နိုင်တဲ့အခါ ကူညီပေးပါတယ်။ 'ဆုတောင်းခြင်းရဲ့ ဆရာသခင်' ဆီကနေ သင်ဘာတွေသင်ယူနိုင်မလဲဆိုတာကို အတူတကွကြည့်ရှုကြရအောင်။

ယေရှု ဘယ်အချိန်တွေမှာ ဆုတောင်းခဲ့သလဲ

သမ္မာကျမ်းစာထဲမှာ ယေရှု ဘယ်နှစ်ကြိမ်ဆုတောင်းခဲ့တယ်ဆိုတာကို ဖော်ပြထားလဲ သင်သိပါသလား။ ၂၅ ကြိမ်တိတိပါ။ ဒါကြောင့် သမ္မာကျမ်းစာထဲမှာ ယေရှုက ဆုတောင်းခြင်းကို ဘယ်လိုလုပ်ဆောင်ခဲ့တယ်ဆိုတဲ့ ဥပမာ ၂၅ ခုရှိပါတယ်။ အဲဒီထဲကနေ ကျွန်ုပ်တို့ တစ်ခုခု လေ့လာသင်ယူနိုင်မယ်လို့ မျှော်လင့်ပါတယ်။ အားလုံးကိုတော့ မလေ့လာကြတော့ဘဲ၊ အထူးအချက်အချို့ကိုပဲ ဖော်ပြပေးလိုက်ပါတယ်။

ယေရှုသည် .......

...အနားယူရန် လိုအပ်သည့်အခါ ဆုတောင်းသည်။

ယေရှုသည်လည်း အနားယူရန်လိုအပ်ပြီး တစ်ယောက်တည်းဆုတောင်းရန် ဆိတ်ငြိမ်သောနေရာကို ရှာဖွေလေ့ရှိကြောင်း ရှင်မာကု ၁ မှာ တွေ့နိုင်ပါတယ်။

...ဝမ်းနည်းသည့်အခါ ဆုတောင်းသည်။

သူ့ရဲ့ဝမ်းကွဲတော်သူနဲ့ မိတ်ဆွေဖြစ်သူ နှစ်ခြင်းဆရာယောဟန် ခေါင်းဖြတ်ခံရကြောင်း ယေရှုကြားသိတဲ့အခါ၊ မဿဲ ၁၄ အရ သူဟာ သူ့ရဲ့ဝမ်းနည်းမှုကို ဘုရားသခင်နဲ့အတူ ဖြေဖျောက်ဖို့ တစ်ကိုယ်တည်း ဆိတ်ငြိမ်ရာအရပ်ကို ရှာဖွေခဲ့ပါတယ်။

...ကျေးဇူးတင်သည့်အခါ ဆုတောင်းသည်။

လုကာ ၁၀ မှာ ယေရှုဟာ ကြီးမားတဲ့ဝမ်းမြောက်ခြင်းကို ခံစားရပြီး ဘုရားသခင်ကို ကျေးဇူးတင်ဖို့ ချက်ချင်းဆုတောင်းခဲ့တဲ့ အခိုက်အတန့်ကို သမ္မာကျမ်းစာက ဖော်ပြထားပါတယ်။

ကြောက်ရွံ့သည့်အခါ ဆုတောင်းသည်။

ယေရှုဟာလည်း ကားတိုင်ပေါ်အသေခံတော်မမူမီ သောကြာကြီးနေ့ (Good Friday) မှာ စိုးရိမ်ကြောက်ရွံ့ခဲ့တဲ့အတွက်၊ ဒုက္ခဝေဒနာ မခံစားရဖို့ ဘုရားသခင်ထံ တောင်းပန်ခဲ့ပါတယ်။ လုကာ ၂၂ အရ၊ ဆုတောင်းနေစဉ် စိုးရိမ်ကြောက်ရွံ့မှုကြောင့် သွေးချွေးများထွက်ခဲ့တယ်လို့တောင် ဆိုထားပါတယ်။

...အရေးကြီးသော ဆုံးဖြတ်ချက်တစ်ခု ချမှတ်ရန်လိုအပ်သည့်အခါ ဆုတောင်းသည်။

ယေရှုသည် ရွေးချယ်မှုများပြုလုပ်ရသည့်အခါ၊ သူသည် ဆုတောင်းရန် အချိန်ယူပါသည်။ သူ၏ရွေးချယ်မှုသည် ဘုရားသခင်၏ရွေးချယ်မှုဖြစ်စေလိုသည်။ လုကာ ၆ တွင် ယေရှုသည်မည်သည့်လူတို့သည် သူ၏တပည့်တော်များ၊ နောက်လိုက်များဖြစ်လာမည်ကို ရွေးချယ်ရသည့်အခါ၊ မှန်ကန်သောလူတို့ကို ရွေးချယ်နိုင်ရန် ဉာဏ်ပညာအတွက် တစ်ညလုံး ဘုရားသခင်ထံ ဆုတောင်းခဲ့သည်။

..နိမိတ်လက္ခဏာ ပြုလုပ်ပြီးသည့်အခါ ဆုတောင်းသည်။

ကျွန်ုပ်တို့ဘဝတွင် နိမိတ်လက္ခဏာတစ်ခုလိုအပ်လျှင်၊ ကျွန်ုပ်တို့ဆုတောင်းကြပါသည်။ သမ္မာကျမ်းစာမှာ ယေရှုဟာ အံ့ဖွယ်အမှုတွေ ပြုလုပ်ပြီးတဲ့အခါတိုင်း ဆုတောင်းလေ့ရှိတာကို တွေ့ရပါတယ်။

ဘာက ထူးခြားနေပါသလဲ။ ကျွန်ုပ်တို့ရဲ့ ‘ဆုတောင်းခြင်း၏ ဆရာသခင်’ ဟာ ခံစားလွယ်ပြီး စိတ်ခံစားမှုရှိတဲ့ ပုဂ္ဂိုလ်တစ်ဦး ဖြစ်ပါတယ်။ ယေရှုဟာ သူ့ရဲ့စိတ်ခံစားမှုတွေဖြစ်တဲ့ အကောင်း၊ အဆိုးအားလုံးကို ဘုရားသခင်နဲ့ မျှဝေခဲ့ပါတယ်။ သူဟာ သူ့ရဲ့နေ့စဉ်ဘဝတိုင်းမှာ ဘုရားသခင်ကို ပါဝင်စေခဲ့ပါတယ်။

ဒါဆိုရင် ကျွန်တော် ဘယ်လိုဆုတောင်းရမလဲ

ဒီဆောင်းပါးကို သင်ဖတ်နေတယ်ဆိုရင်၊ သင်ကိုယ်တိုင် ဆုတောင်းချင်တဲ့ဆန္ဒရှိနေနိုင်ပါတယ်။ ဘယ်လိုဆုတောင်းရမလဲဆိုတာကို သိဖို့ခက်ခဲနေပါသလား။ ယေရှုက သင့်ကို သေချာပေါက်ကူညီနိုင်ပါတယ်။

ယေရှုဟာ အမြဲတမ်း ဘုရားသခင်ကို ဆုတောင်းပါတယ်။ သူဟာ ဘုရားသခင်နဲ့ ပုဂ္ဂိုလ်ရေးအရ ဆက်ဆံရေးရှိပြီး သူက ကိုယ်တော့်ကို အဘလို့ခေါ်ကာ သင့်ကိုလည်း ထို့အတူတူခေါ်ဖို့ အားပေးပါတယ်။ ယေရှုဟာ ဆုတောင်းဖို့အတွက် အချိန်သီးသန့်ယူပြီး သူ့ရဲ့အာရုံစိုက်မှုကို ထိန်းသိမ်းထားနိုင်မယ့် ပတ်ဝန်းကျင်တစ်ခုကိုလည်း ဖန်တီးလေ့ရှိပါတယ်။

ယေရှုက "ကျေးဇူးတင်ပါတယ်" လို့လည်း မကြာခဏပြောလေ့ရှိပါတယ်။ သူ့ရဲ့ဆုတောင်းချက်တွေမှာ ဘုရားသခင်ကို အရာအားလုံးအတွက် ကျေးဇူးတင်လေ့ရှိပါတယ်။ ဒီအချက်ကို ဖိလိပ္ပိ ၄:၆ (JBMLE) မှာ ကျွန်ုပ်တို့ကိုလည်း လက်ဆင့်ကမ်းထားပါတယ် -

“အ​ဘယ်​အ​မှု​ကို​မျှ စိုး​ရိမ်​ခြင်း​မ​ရှိ​ဘဲ အ​ရာ​ရာ၌ ကျေး​ဇူး​တော်​ကို ချီး​မွမ်း​ခြင်း​နှင့်​တ​ကွ ဆု​တောင်း​ပ​တ္ထ​နာ ပြု​သော​အား​ဖြင့်၊ သင်​တို့​တောင်း​ပန်​လို​သော အ​ရာ​များ​တို့​ကို ဘု​ရား​သ​ခင်​အား ကြား​လျှောက်​ကြ​လော့။”

စစ်မှန်တဲ့ 'ဆရာသခင်' တစ်ယောက်အနေနဲ့ သူက သင့်ကို ပိုကြီးပြီး ပိုရဲရင့်စွာ ဆုတောင်းဖို့ပေါ့ စိန်ခေါ်ထားပါတယ်။ မဿဲ ၁၇:၂၀ (JBMLE) မှာ ဘာပြောထားလဲ ဆိုလျှင်-

ကိုယ်တော်ကလည်း၊ “သင်​တို့​သည် ယုံ​ကြည်​ခြင်း​မ​ရှိ​သော​ကြောင့် မ​နှင်​ထုတ်​နိုင်​ကြ။ ငါ​အ​မှန်​ဆို​သည်​ကား၊ သင်​တို့​သည် မုန်​ညင်း​စေ့​ခန့်​မျှ​လောက်​သော ယုံ​ကြည်​ခြင်း​ရှိ​လျှင်၊ ထို​တောင်​ကို နေ​ရာ​မှ​ရွေ့​လော့​ဟု ဆို​ကြ​သော်၊ နေ​ရာ​မှ ရွေ့​လိမ့်​မည်။ ယုံ​ကြည်​ခြင်း​ရှိ​လျှင် သင်​တို့​မ​တတ်​နိုင်​သော​အ​မှု မ​ရှိ။” ဟုဆိုထားပါတယ်။

ယေရှုသည် စုံလင်မှုကို မရှာဖွေပါ

ယေရှုနဲ့ တခြားဆရာသခင်တွေကြားမှာ ကြီးမားတဲ့ကွာခြားချက်တစ်ခုရှိပါတယ်။ တခြားပညာရပ်တွေရဲ့ ဆရာသခင်တွေက အမြဲတမ်း စုံလင်မှုကို ကြိုးစားရှာဖွေနေချိန်မှာ၊ ယေရှုကတော့ မဟုတ်ပါဘူး။ သူ့ရဲ့ရည်မှန်းချက်က ကျွန်ုပ်တို့ စုံလင်စွာဆုတောင်းနိုင်ဖို့ မဟုတ်ပါဘူး။ ဆန့်ကျင်ဘက်အနေနဲ့၊ "စုံလင်တဲ့ဆုတောင်းချက်များ" ဖြစ်အောင် ဆုတောင်းတာမဟုတ်ကြောင်း သတိပေးထားပါတယ်။ ဆုတောင်းခြင်းရဲ့ တကယ့်ရည်ရွယ်ချက်က တခြားသူတွေကို အထင်ကြီးစေဖို့ ဒါမှမဟုတ် ကျွန်ုပ်တို့ဟာ ဘယ်လောက်ကောင်းတဲ့လူလဲဆိုတာကို ပြသဖို့လည်းမဟုတ်ပါဘူး။ ဟုတ်ပါတယ်၊ ကျွန်ုပ်တို့က တခြားသူတွေကို ဆုတောင်းပေးခြင်း၊ ကိုယ့်ရဲ့အတွေ့အကြုံတွေကို မျှဝေခြင်းအားဖြင့် ကူညီနိုင်ရင်တော့ ကောင်းပါတယ်။ ဒါပေမဲ့ ဆုတောင်းခြင်းမှာ အဓိကက သင်နဲ့ဘုရားသခင်ကြားက ဆက်သွယ်မှုပါပဲ။ ဒီဆက်ဆံရေးမှာ မျက်နှာဖုံးတွေ၊ လှပတဲ့စကားလုံးတွေ ဒါမှမဟုတ် ဟန်ဆောင်မှုတွေအတွက် နေရာမရှိပါဘူး။ ဘုရားသခင်က ကျွန်ုပ်တို့ရဲ့နှလုံးသားကိုပဲ မြင်ပါတယ်။

ကျော်ကြားသော ဆုတောင်းပတ္ထနာ 'သခင့်ဆုတောင်း'

ဆုတောင်းပတ္ထနာ 'သခင့်ဆုတောင်း'ဟာ သမ္မာကျမ်းစာထဲမှာ အကျော်ကြားဆုံးဆုတောင်းပတ္ထနာဖြစ်ပါတယ်။ ဒါကြောင့် သင်ဟာဆုတောင်းဖို့ စကားလုံးတွေရှာမရနိုင်ဖြစ်လျှင်၊ ဒီဆုတောင်းပတ္ထနာကိုဖတ်ပြီး ဆုတောင်းခြင်းအကြောင်း ယေရှုဆီကနေ သင်ဘာတွေသင်ယူနိုင်မလဲဆိုတာကို စဉ်းစားကြည့်ပါ။

1. ကောင်းကင်ဘုံ၌ရှိတော်မူသော အကျွန်ုပ်တို့အဘ၊ ကိုယ်တော်၏နာမတော်အား ရိုသေလေးမြတ်ခြင်းရှိပါစေသော။ နိုင်ငံတော်တည်ထောင်ပါစေသော။ အလိုတော်သည် ကောင်းကင်ဘုံ၌ပြည့်စုံသကဲ့သို့ မြေကြီးပေါ်၌လည်း ပြည့်စုံပါစေသော။

2. အသက်မွေးလောက်သောအစာကို အကျွန်ုပ်တို့အား ယနေ့ပေးသနားတော်မူပါ။ သူတစ်ပါးသည် အကျွန်ုပ်တို့ကိုပြစ်မှားသောအပြစ်များကို အကျွန်ုပ်တို့သည် လွှတ်သကဲ့သို့ အကျွန်ုပ်တို့၏အပြစ်များကိုလည်း လွှတ်တော်မူပါ။

3. အပြစ်သွေးဆောင်ရာသို့ မလိုက်မပါစေဘဲ မကောင်းသောအမှုအရာမှလည်း ကယ်နှုတ်တော်မူပါ။

အ​စိုး​ပိုင်​သော​အ​ခွင့်​နှင့် ဘုန်း​တန်​ခိုး​အာ​နု​ဘော်​သည် က​မ္ဘာ​အ​ဆက်​ဆက် ကိုယ်​တော်၌​ရှိ​ပါ၏။ အာ​မင်

ဒီဆုတောင်းပတ္ထနာမှာ ယေရှုက အရေးကြီးတယ်လို့ ယူဆတဲ့အရာတွေကို အတိအကျဖော်ပြထားပါတယ် -

• ဘုရားသခင်ကို အာရုံစိုက်ပြီး ကိုယ်တော်နဲ့ထိုက်တန်တဲ့ ဂုဏ်တော်တွေကို ပေးအပ်ပါ။

• သင်လိုအပ်တဲ့အရာကို မျှဝေပါ၊ ဒါပေမဲ့ သင်ဘာပေးဆပ်နိုင်တယ်ဆိုတာကိုလည်း စဉ်းစားပါ။

• ကျွန်ုပ်တို့ဟာ ဘုရားသခင်ကို လိုအပ်ကြောင်း၊ ကျွန်ုပ်တို့ကို ကာကွယ်ပေးဖို့နဲ့ ခွင့်လွှတ်ပေးဖို့ လိုအပ်ကြောင်း အသိအမှတ်ပြုပါ။

သင်ဟာ ရှိပြီးသားဆုတောင်းပတ္ထနာတစ်ခုကို ရွတ်ဆိုသည်ဖြစ်စေ (သမ္မာကျမ်းစာမှာ ဆုတောင်းပတ္ထနာ ၆၅၀ ချက်ရှိပါတယ်)၊ ကိုယ့်ရဲ့ကိုယ်ပိုင်စကားလုံးတွေနဲ့ပဲ ဆုတောင်းသည်ဖြစ်စေ၊ ဒီအချက်တွေကို ထည့်သွင်းဖို့ ကြိုးစားကြည့်ပါ။

ယေရှု၏ ABCD ဆုတောင်းခြင်း

ဥပမာများ၊ ကျမ်းချက်များနှင့် အကြံပြုချက်များအားလုံးက သင့်ကို အနည်းငယ် ရှုပ်ထွေးစေနိုင်ပါသည်။ ဒါကြောင့် ယေရှုဆီကနေ ဆုတောင်းခြင်းအကြောင်း သင်ယူနိုင်ရန် အလွန်တိုတောင်းတဲ့အကျဉ်းချုပ်အားဖြင့် ဖော်ပြပေးလိုက်ပါတယ်။

A – Attention (အာရုံစိုက်ခြင်း) : သင်၏အာရုံစိုက်မှုကို ဘုရားသခင်အပေါ်၌ ထားပါ။

B – Be Thankful (ကျေးဇူးတင်ခြင်း) : သင့်ဘဝရဲ့ အခြေအနေတိုင်းမှာ ဘုရားသခင်ကို ကျေးဇူးတင်ပါ။

C – Checking (စစ်ဆေးခြင်း) : မှန်ကန်တဲ့လမ်းကြောင်းပေါ်မှာ ရှိနေရဲ့လားဆိုတာကို ဘုရားသခင်နဲ့ ပုံမှန် စစ်ဆေးပါ။

D – Sharing (မျှဝေခြင်း) : သင်၏စိတ်ထဲမှာ ရှိနေတဲ့အရာအားလုံးကို မျှဝေပါ။

ဘဝမှာ လဲကျတဲ့အခါ သင်ဟာ ဆုတောင်းခြင်းအားဖြင့် ပြန်လည်ထနိုင်ပါတယ်။ ရှေ့ဆက်ပါ။ နေ့ရက်တိုင်းဟာ အစအသစ်တစ်ခုပါပဲ!

သင်ဆုတောင်းဖို့ ခက်ခဲနေပါသလား။ ကျွန်ုပ်တို့သည် သင့်အတွက် ဆုတောင်းပေးရန် ဝမ်းမြောက်စွာ စောင့်မျှော်နေပါသည်။ သင်၏ဆုတောင်းတောင်းဆိုချက်များကို ဤနေရာတွင် ပေးပို့နိုင်ပါသည်။ သို့မဟုတ် သင်၏ ကိုယ်တွေ့ ဇာတ်လမ်းများကို သက်သေခံပြောပြနိုင်ပါသည်။ သို့မဟုတ် သင်၏မေးခွန်းများကို ဤနေရာတွင် မေးမြန်းနိုင်ပါသည်။