ယုံကြည်ခြင်းအားဖြင့် အမျက်ဒေါသကို အောင်မြင်ခြင်း
ဘုရားသခင်၏ နှုတ်ကပတ်တော်တွင် ငြိမ်သက်ခြင်းကို ရှာဖွေခြင်း - သင်ဟာ အမျက်ဒေါသကြောင့် ထိန်းမနိုင်သိမ်းမရ ဖြစ်ပြီး နောင်တရစရာ စကားတွေ ပြောမိတာမျိုး၊ ဒါမှမဟုတ် ထိန်းချုပ်မရတော့ပဲ ပေါက်ကွဲတုံ့ပြန်မိတာမျိုး ကြုံဖူးပါသလား။ ပဋိပက္ခတစ်ခုက စိတ်ပျက်ခြင်းကို ဖြစ်ပေါ်စေပြီး ရုတ်တရက် ထိန်းချုပ်မရသလို သင့်ကို အပြစ်ဖြစ်စေတယ်ဟု ခံစားရစေတယ်ဆိုရင်၊ သင်တစ်ယောက်တည်း မဟုတ်ပါဘူး။ အမျက်ဒေါသဟာမထိန်းချုပ်နိုင်တဲ့အခါ တခြားသူတွေနဲ့ မိမိကိုယ်ကိုပါ ထိခိုက်လာစေနိုင်ပါတယ်။ ဒါပေမဲ့ သမ္မာကျမ်းစာက နာကျင်မှုအစား ငြိမ်သက်ခြင်းကို ဆောင်ကြဉ်းပေးတဲ့ နည်းလမ်းနဲ့ ကိုင်တွယ်နိုင်မယ့် ဉာဏ်ပညာကို ဖော်ပြထားပါတယ်။
ဒီဆောင်းပါးမှာ၊ အမျက်ဒေါသကို ကိုင်တွယ်ဖြေရှင်းဖို့အတွက် ကျမ်းစာလာ နည်းဗျူဟာတွေကို သင်လေ့လာရမှာ ဖြစ်ပါတယ်။ သင်ရဲ့ ဝိညာဉ်ရေးရာကိုပါပြုစုပေးပြီး အမျက်ဒေါသအပါအဝင် သင့်ဘဝရဲ့ စိန်ခေါ်မှုတွေနဲ့ ကိုက်ညီတဲ့ သက်ဆိုင်ရာ ခြေလှမ်းများကိုလည်း ထိုသမ္မာကျမ်းစာမှာ တွေ့ရမှာ ဖြစ်ပါတယ်။ ဒီဆောင်းပါးဟာ သင့်ကို ကုစားနိုင်ရန်နဲ့ ဒေါ်သထွက်သည့်အခါ မိမိကိုယ်ကို ထိန်းချုပ် နိုင်ရန်ကို ကူညီပေးပြီး ဘုရားသခင်ရဲ့ နည်းလမ်းအတိုင်း အမျက်ဒေါသကို အောင်မြင်ကျော်လွှားပြီး စီမံခန့်ခွဲနိုင်ဖို့ လက်တွေ့ကျတဲ့ ခြေလှမ်းတွေ လှမ်းနိုင်အောင်လည်း ကူညီပေးပါလိမ့်မယ်။
ပထမအဆင့်- အမျက်ဒေါသကို နားလည်ခြင်း
အမျက်ဒေါသထွက်ခြင်းဟာ သူ့အလိုလို အပြစ်ဖြစ်မသွားပါ။ ဒါဟာ ကျွန်ုပ်တို့ မနှစ်သတ်သော အရာဖြစ်ပေါ်တဲ့အခါ ဒါမှမဟုတ် မတရားမှုကိုခံစားရတဲ့အခါ ထုတ်ဖော်ပြဖို့ရန် ဘုရားသခင်က ပေးထားတဲ့ သဘာဝအလျောက်ဖြစ်ပေါ်တဲ့ စိတ်ခံစားမှုတစ်ခုဖြစ်ပါတယ်။ ယေရှုပင်လျှင် လူတို့၏ မယုံကြည်နိုင်းခြင်းကို ဝမ်းနည်းကာ စိတ်ဆိုးပြီး အမျက်ထွက်ခဲ့ပါတယ်ဟု (မာကု ၃:၅) မှာဖော်ပြထားပါတယ်။ သို့သော် အမျက်ဒေါသဟာ ထိန်းမနိုင်တဲ့ ဒေါသအဖြစ် ပြောင်းလဲသွားတဲ့အခါ ဒါမှမဟုတ် ကျွန်ုပ်တို့ကို ထိခိုက်စေတဲ့ နည်းလမ်းတွေနဲ့ ပြုမူစေလာတဲ့အခါမှာတော့ အန္တရာယ်ရှိလာပါတယ်။ သမ္မာကျမ်းစာက “အမျက်ထွက်ရာတွင် အပြစ်မရှိစေနှင့်။” (ဧဖက် ၄:၂၆ JBMLE) ဟု အမျက်ဒေါသရဲ့ ထိန်းချုပ်မှုကို ခံရတဲ့အခါ ဖြစ်ပေါ်လာတတ်တဲ့ အကျိုးဆက်တွေအကြောင်း သတိပေးထားပါတယ် ။ အမျက်ထွက်တဲ့ ခံစားချက်က မှားတာမဟုတ်ဘဲ၊ အဲဒီခံစားချက်အပေါ် ကျွန်ုပ်တို့ ဘယ်လိုတုန့်ပြန်လိုက်သလဲဆိုတာက အရေးကြီးပါတယ်။
မဖြေရှင်းနိုင်သော အမျက်ဒေါသဟာ အော်ဟစ်ခြင်း၊ နားမထောင်ဘဲ ငြင်းဆန်ခြင်း၊ ဒါမှမဟုတ် ကြမ်းတမ်းစွာ တုံ့ပြန်ခြင်းလိုမျိုး ပျက်စီးစေတဲ့ အပြုအမူတွေကို ဖြစ်ပေါ်စေနိုင်ပါတယ်။ ကျွန်ုပ်တို့ဟာ မစဉ်းစားမစဉ်ခြင်ဘဲ စကားပြောမိတဲ့အခါ၊ ကျွန်ုပ်တို့ရဲ့ စကားလုံးတွေက တခြားသူတွေကို ထိခိုက်စေနိုင်ပြီး ကုစားဖို့ အချိန်အကြာကြီး ယူရတဲ့ အမာရွတ်တွေကို ထားခဲ့နိုင်ပါတယ်။ သုတ္တံကျမ်း ၂၉:၁၁ JBMLE က ““မိုက်သောသူသည် မိမိကြံစည်သမျှကို ဖော်ပြတတ်၏။ ပညာရှိသောသူမူကား၊ အဆင်မသင့်မီ ထိမ်ဝှက်တတ်၏။” ဟုကျွန်ုပ်တို့ကို သတိပေးထားပါတယ်။ အမျက်ဒေါသကို ကိုင်တွယ်နိုင်ဖို့ သင်ယူခြင်းဟာ ယေရှုနဲ့အတူ လျှောက်လှမ်းရာမှာ အဓိကကျတဲ့ ခြေလှမ်းတစ်ခု ဖြစ်ပါတယ်။
သမ္မာကျမ်းစာထဲမှ အမျက်ဒေါသကို ကိုင်တွယ်နည်း
သမ္မာကျမ်းစာက အမျက်ဒေါသကို ဘယ်လိုကိုင်တွယ်ရမလဲဆိုတာနဲ့ ပတ်သက်ပြီး ရှင်းလင်းတဲ့ လမ်းညွှန်ချက်တွေကို ပေးထားပါတယ်။ ယာကုပ်ဩဝါဒစာ ၁:၁၉ JMBLE မှာ “သို့ဖြစ်၍၊ ငါချစ်သော ညီအစ်ကိုတို့၊ ခပ်သိမ်းသောသူတို့သည် နားကြားခြင်းငှာ လျင်မြန်ကြစေ။ စကားပြောခြင်းငှာလည်းကောင်း၊ အမျက်ထွက်ခြင်းငှာလည်းကောင်း နှေးကြစေ။ ” လို့ ဆိုထားပါတယ်။ ဒီကျမ်းချက်ဟာ ထွက်မြောက်ရာကျမ်း ၃၄:၆ JMBLE မှာ မောရှေအား ဘုရားသခင်ကိုတိုင် ပေးခဲ့တဲ့ ဗျာဒိတ်စကားတော်များကိုလည်း ထင်ဟပ်စေပါတယ်- ““ထာဝရဘုရားသည် မောရှေရှေ့၌ကြွသွားတော်မူလျက်၊ ထာဝရဘုရား၊ ထာဝရဘုရား၊ ချစ်သနားခြင်းမေတ္တာကရုဏာနှင့် ပြည့်စုံ၍ စိတ်ရှည်ခြင်း၊ ကျေးဇူးပြုခြင်း၊ သစ္စာစောင့်ခြင်းနှင့် ကြွယ်ဝတော်မူထသော၊”ဒီကျမ်းချက်တွေက ကျွန်ုပ်တို့ဒေါ်သထွက်သည့်အခါ ဘယ်အရာကိုမျှ မတုံ့ပြန်ခင် ခေတ္တရပ်တန့်ပြီး စဉ်းစားဆင်ခြင်ကာ ဉာဏ်ပညာနဲ့ တုံ့ပြန်နိုင်ဖို့ သတိပေးနေပါတယ်။ မကြာခဏဆိုသလို ပဋိပက္ခဖြစ်ပွားလာတဲ့အခါမှာ ကျွန်ုပ်တို့ဟာ နားထောင်ခြင်းနဲ့ ကျေးဇူးတရားနဲ့ တုံ့ပြန်ခြင်းရဲ့ အရေးပါမှုကို လျစ်လျူရှုပြီး အမျက်ဒေါသကို ဦးဆောင်ခွင့်ပေးလိုက်တတ်ကြပါတယ်။
အမျက်ဒေါသကို ကိုယ်တွယ်နိုင်ခြင်းဟာ မိမိကိုယ်ကို သတိပြုမိခြင်းကနေ စတင်ပါတယ်။ ကျွန်ုပ်တို့ ဘယ်အချိန်မှာ ဒေါသထွက်နေတယ်၊ ဘာကြောင့်လဲဆိုတာကို သိရှိနားလည်ဖို့ရန် အလွန်အရေးကြီးပါတယ်။ သင်ဟာ သင့်ကိုမည်သူမျှ မလေးစားခံရသလို ခံစားနေရသောကြောင့်လား၊ ဝန်ပိနေသောကြောင့်လား၊ အထင်လွဲခံရသောကြောင့်လား စတဲ့ ကျွန်ုပ်တို့ရဲ့ အမျက်ဒေါသနောက်ကွယ်မှာ ဘာရှိနေသလဲ စတဲ့အမျက်ဒေါသရဲ့ ရင်းမြစ်ကို ရှာတွေ့ပြီဆိုလျှင်၊ ကျွန်ုပ်တို့ဟာ ထိုခံစားချက်များအားလုံးကို ဘုရားသခင်ရဲ့ရှေ့မှောက်သို့ ယူဆောင်လာပြီး စိတ်လိုက်မာန်ပါ တုံ့ပြန်မယ့်အစား စိတ်ရှည်ခြင်းနဲ့ ဉာဏ်ပညာနဲ့ တုံ့ပြန်နိုင်ဖို့ ဘုရားသခင်ရဲ့ အကူအညီကို တောင်းခံနိုင်ပါတယ်။
သမ္မာကျမ်းစာက အမျက်ဒေါသကို သိမ်းမထားပဲ အလျင်အမြန် ဖြေရှင်းဖို့ကိုလည်း သတိပေးထားပါတယ်။ ဧဖက်ဩဝါဒစာ ၄:၂၆ -၂၇ မှာ ““အမျက်ထွက်ရာတွင် အပြစ်မရှိစေနှင့်။- အမျက်မပြေဘဲ နေမဝင်စေနှင့်။ မာရ်နတ်ကို အခွင့်မပေးကြနှင့်။-” လို့ ဖော်ပြထားပါတယ်။ အမျက်ဒေါသကို ဆုပ်ကိုင်ထားခြင်းဟာ ကျွန်ုပ်တို့ရဲ့နှလုံးသားထဲမှာ ခါးသီးခြင်းနဲ့ မကျေနပ်မှုတွေကို အမြစ်တွယ်စေနိုင်ပြီး ဆက်ဆံရေးတွေကို ပျက်စီးစေကာ ငြိမ်သက်ခြင်းနဲ့ ဝေးကွာစေပါတယ်။ ဒါကြောင့် ဒီဖြစ်စဉ်မှာ ခွင့်လွှတ်ခြင်းဟာ အဓိကကျတဲ့ အခန်းကဏ္ဍကနေ ပါဝင်နေပါတယ်။ အမျက်ဒေါသဟာ တကယ့်နာကျင်မှု ဒါမှမဟုတ် မတရားမှုတွေကနေ မကြာခဏ ပေါက်ဖွားလာပေမဲ့၊ တပါးသူများကို ခွင့်လွှတ်လိုက်ခြင်းက ကျွန်ုပ်တို့ကို ဝန်ထုပ်ဝန်ပိုးတွေကို လွှတ်ချပြီး ခရစ်တော်အားဖြင့် ကုစားခြင်းကို ရှာဖွေနိုင်စေပါတယ်။
ပြင်းထန်သောဒေါသနှင့် စိတ်အနှောင့်အယှက်ဖြစ်ခြင်းကို စွန့်လွှတ်ခြင်း
ကျွန်ုပ်တို့ရဲ့ စိတ်ခံစားမှုတွေ ထိန်းချုပ်မရတော့တဲ့အထိ အပြင်းထန်သောဒေါသထွက်ချိန်တွေမှာ၊ ဘုရားသခင်က ငြိမ်သက်ခြင်းကို ပေးသနားတော်မူတယ်ဆိုတာကို အမှတ်ရဖို့ အရေးကြီးပါတယ်။ ဖိလိပ္ပိဩဝါဒစာ ၄:၆ JBMLE က “အဘယ်အမှုကိုမျှ စိုးရိမ်ခြင်းမရှိဘဲ အရာရာ၌ ကျေးဇူးတော်ကို ချီးမွမ်းခြင်းနှင့်တကွ ဆုတောင်းပတ္ထနာ ပြုသောအားဖြင့်၊ သင်တို့တောင်းပန်လိုသော အရာများတို့ကို ဘုရားသခင်အား ကြားလျှောက်ကြလော့။-” ဟု ကျွန်ုပ်တို့ရဲ့ စိတ်ပျက်မှုတွေ၊ ဒေါသတွေ၊ စိတ်အနှောင့်အယှက်ဖြစ်စေတဲ့ ခံစားချက် စသည်အရာအားလုံးကို ဘုရားသခင်ထံ ဆုတောင်းခြင်းဖြင့် ဆက်ကပ်ဖို့ တိုက်တွန်းထားပါတယ်။ ဘုရားသခင်ဟာ ထိုအခက်အခဲများရဲ့အလယ်မှာတောင် ကျွန်ုပ်တို့ နားလည်နိုင်စွမ်းထက် သာလွန်တဲ့ ငြိမ်သက်ခြင်းကို ပေးမယ်လို့ ကတိပေးထားပါတယ်။
သင်ဟာ အသေးအဖွဲကိစ္စတွေအတွက် စိတ်အနှောင့်အယှက်ဖြစ်ကာ ရုန်းကန်နေရလျှင် အဲဒီစိတ်ပျက်မှုရဲ့ ရင်းမြစ်ကို ပြန်လည်သုံးသပ်ဖို့ အရေးကြီးပါတယ်။ တစ်ခါတစ်ရံမှာ ဒါဟာ မာန၊ စိတ်ဖိစီးမှု၊ ဒါမှမဟုတ် မပြည့်ဝနိုင်တဲ့ မျှော်လင့်ချက်လိုမျိုး ပိုမိုနက်ရှိုင်းတဲ့ ပြဿနာတွေမှာ အမြစ်တွယ်နေတတ်ပါတယ်။ ဒီခံစားချက်တွေကို ဘုရားသခင်ထံ ဆုတောင်းခြင်းအားဖြင့် ယူဆောင်သွားခြင်းက ကျွန်ုပ်တို့ကို ပိုမိုရှင်းလင်းတဲ့ အမြင်နှင့် သုံးသပ်နိုင်စေကာ အမျက်ဒေါသကို မကောင်းတဲ့ အပြုအမူ တုံပြန်မှုများအဖြစ် မပြောင်းလဲသွားအောင် ကာကွယ်ပေးပါတယ်။
ဘုရားသခင်၏ နှုတ်ကပတ်တော်တွင် ခွန်အားကို ရှာဖွေခြင်း
အမျက်ဒေါသကို အောင်မြင်ပြီး ငြိမ်သက်ခြင်းကို ရှာဖွေနိုင်ဖို့ရန်အတွက်၊ ကျွန်ုပ်တို့ဟာ ဘုရားသခင်ရဲ့ နှုတ်ကပတ်တော်ကို နေ့ရက်စဉ်တိုင်းဖတ်ရှုဖို့ရန် လိုအပ်ပါတယ်။ သမ္မာကျမ်းစာက ကျွန်ုပ်တို့ကို မိမိကိုယ်ကို ထိန်းချုပ်ခြင်းနဲ့ စိတ်ရှည်ခြင်းမှာ ကြီးထွားလာစေဖို့ရန် လိုအပ်တဲ့ ဉာဏ်ပညာနဲ့ ခွန်အား များကိုပေးပါတယ်။ ကျွန်ုပ်တို့ ကျမ်းစာဖတ်ရှုတဲ့အခါ၊ ဘုရားသခင်ဟာ ကျွန်ုပ်တို့ကို အမျက်ထွက်ခြင်း၌ နှေးကွေးတဲ့ လူတွေအဖြစ် ပြောင်းလဲပေးဖို့ ကျွန်ုပ်တို့ရဲ့ နှလုံးသားထဲမှာ အလုပ်လုပ်နေပါတယ်။ သုတ္တံကျမ်း ၁၅:၁ JBMLE က ကျွန်ုပ်တို့ကို “ဖြည်းညင်းသော စကားသည် စိတ်ကိုဖြေတတ်၏။ ကြမ်းတမ်းသောစကားမူကား၊ အမျက်ကို နှိုးဆော်တတ်၏။” ဟုဖော်ပြပေးထားပါတယ်။သမ္မာကျမ်းစာကို အချိန်ပေးလေ့လာခြင်းအားဖြင့်၊ အခက်ခဲပြသနာနဲ့ ရင်ဆိုင်ရချိန်မှာတောင် နူးညံ့သိမ်မွေ့စွာ ဘယ်လိုတုံ့ပြန်ရမလဲဆိုတာကို ကျွန်ုပ်တို့ သင်ယူနိုင်ပါတယ်။
နောက်တစ်ဆင့်တက်လှမ်းရန်
သင်ဟာ မကြခနဒေါသထွက်ပေါက်ကွဲတတ်ခြင်း၊ မကြာခဏ စိတ်အနှောင့်အယှက်ဖြစ်ခြင်း၊ ဒါမှမဟုတ် အမျက်ဒေါသကို ကိုင်တွယ်ဖြေရှင်းရာမှာ အခက်အခဲရှိခြင်း စသည့်အရာများနှင့် ရင်ဆိုင်နေရလျှင် ကျွမ်းကျင်ပညာရှင်များ၏ အကူအညီကိုလည်း ရယူဖို့ တိုက်တွန်းလိုပါတယ်။ ဒါနဲ့အတူ ဘုရားသခင်ရဲ့ နှုတ်ကပတ်တော်မှာလည်း မျှော်လင့်ချက်များကို သင်ရှာတွေ့နိုင်ပါတယ်။ ဘုရားသခင်ရဲ့ သွန်သင်ချက်တွေက ပြသနာများကို စိတ်ရှည်ခြင်း၊ နှိမ့်ချခြင်းနဲ့ ဘယ်လိုချဉ်းကပ်ရမလဲဆိုတာကို လမ်းညွှန်ပေးပြီး၊ သူ၏ ငြိမ်သက်ခြင်းကို သင့်နှလုံးသားထဲမှာ အုပ်စိုးစေပါတယ်။
ကျွန်ုပ်တို့ရဲ့ ရုန်းကန်မှုတွေ အခက်ခဲတွေထဲသို့ ဘုရားသခင်ကို ဖိတ်ခေါ်တဲ့အခါ၊ ကိုယ်တော်ဟာ ကျွန်ုပ်တို့ကို လွတ်မြောက်ခြင်းဆီသို့ ပို့ဆောင်ပေးပါတယ်။ ဒီနေ့ပဲ နှုတ်ကပတ်တော်နှင့်အတူ ခြေစလှမ်းကာ ဘုရားသခင်ရဲ့ နှုတ်ကပတ်တော်အားဖြင့် သင့်နှလုံးသားပြောင်းလဲသွားရန် အခွင့်ပေးလိုက်ပါ။
ငြိမ်သက်ခြင်းရဲ့ ပထမခြေလှမ်းဟာ ‘သတိထားမိခြင်း’ သက်သက်ပဲဆိုရင်ကော။
ဘဝရဲ့ဝန်တွေပိပြီး သင့်ဖုဖုန်းကြည့်ချိန်တွေကလည်း ထိန်းမနိုင်ဖြစ်လာတဲ့အခါ၊ သတိတရားက သင့်ကို ခဏတာရပ်တန့်ပြီး စိတ်ရဲ့ငြိမ်သက်မှုကို ပြန်လည်ရှာဖွေဖို့ တိုက်တွန်းနှိုးဆော်နေပါတယ်။ အခုကစပြီးပေါ့။