သန့်ရှင်းသောဝိညာဉ်တော်က ဘယ်သူလဲ

စကြဝဠာကို အုပ်စိုးတဲ့ ဘုရားသခင်ဟာ အနန္တတန်ခိုးနဲ့ ပြည့်စုံတော်မူပါတယ်။ ဘုရားသခင်ကိုဖော်ပြဖို့ စကားလုံးများစွာ အသုံးပြုကြပေမဲ့၊ အဲဒီစကားလုံးတွေက ကိုယ်တော့်ကို အပြည့်အဝဖော်ပြဖို့ မလုံလောက်ပါဘူး။ ဘုရားသခင်ဟာ ကျွန်ုပ်တို့လူသားတွေရဲ့ နားလည်နိုင်စွမ်းထက် ကျော်လွန်တော်မူပါတယ်။ ကိုယ်တော်ရဲ့ဖြစ်တည်မှုဟာ အနန္တဖြစ်တဲ့အတွက် ကျွန်ုပ်တို့ဟာ ကိုယ်တော့်ကို အပြည့်အဝနားလည်နိုင်မှာ မဟုတ်ပေမဲ့၊ လုံးဝမသိနိုင်ဘူးလို့တော့ ဆိုလိုတာမဟုတ်ပါဘူး။ ကျွန်ုပ်တို့ဟာ ကိုယ်တော့်ကို သိကျွမ်းနိုင်ပြီး၊ ကိုယ်တော်ကလည်း ကျွန်ုပ်တို့နဲ့ ရင်းနှီးကျွမ်းဝင်လိုတဲ့ အလိုတော်ရှိပါတယ်။

ဒါကြောင့် ဘုရားသခင်ဟာ သူ့ရဲ့ဖြစ်တည်မှုကို ကျွန်ုပ်တို့နားလည်နိုင်အောင် ပုံဥပမာတွေ၊ သရုပ်ဖော်ချက်တွေနဲ့ မကြာခဏ ဖော်ပြလေ့ရှိပါတယ်။ သုံးပါးတစ်ဆူမှာပါဝင်တဲ့ သန့်ရှင်းသောဝိညာဉ်တော်ကလည်း ထိုနည်း၎င်းပါပဲ။ ကျွန်ုပ်တို့ဟာ ဝိညာဉ်တော်ကို အပြည့်အဝနားလည်ဖို့ မတတ်နိုင်ပေမဲ့၊ နားလည်နိုင်သလောက်တော့ ကြိုးစားလေ့လာဖို့ လိုအပ်ပါတယ်။

သန့်ရှင်းသောဝိညာဉ်တော်ကို ပုံဥပမာများစွာနဲ့ နှိုင်းယှဉ်လေ့ရှိပါတယ်။ သမ္မာကျမ်းစာရဲ့ မူရင်းဟေဗြဲဘာသာစကားမှာ “ရူအာ” (Ruach) ဆိုတဲ့စကားလုံးကို သန့်ရှင်းသောဝိညာဉ်တော်အတွက် အသုံးပြုလေ့ရှိပြီး၊ အဲဒီစကားလုံးမှာ “ဝိညာဉ်” နဲ့ “လေ” ဆိုပြီး အဓိပ္ပာယ်နှစ်မျိုးရပါတယ်။ ဒါကြောင့် လေဟာ သန့်ရှင်းသောဝိညာဉ်တော်ကို ဖော်ပြဖို့ အကောင်းဆုံးနှိုင်းယှဉ်ချက်တစ်ခု ဖြစ်ပါတယ်။

သင်ဟာ လေကို မမြင်နိုင်၊ မထိနိုင်၊ ဖမ်းဆုပ်ထိန်းချုပ်လို့ မရနိုင်ပါဘူး။ သန့်ရှင်းသောဝိညာဉ်တော်ကလည်း ထိုနည်းတူပါပဲ။ ဒါပေမဲ့ လေကို မမြင်နိုင်၊ မထိနိုင်ပေမဲ့ သူ့ရဲ့တည်ရှိမှုကိုတော့ သင်ခံစားနိုင်တယ် မဟုတ်လား။ လေတိုက်ခတ်လို့ သစ်ပင်တွေလှုပ်ရှားနေတာ၊ တိမ်တွေရွေ့လျားနေတာကို ကြည့်ပြီး လေရှိနေမှန်း သင်သိနိုင်သလိုပါပဲ။ သန့်ရှင်းသောဝိညာဉ်တော်ရဲ့ တည်ရှိမှုကိုလည်း ကိုယ်တော်ပြုလုပ်တဲ့အမှုတော်တွေကနေတစ်ဆင့် ကျွန်ုပ်တို့ သိမြင်နိုင်ပါတယ်။ ခရစ်ယာန်တွေဟာ ဘုရားသခင် ဒီကမ္ဘာပေါ်မှာ သန့်ရှင်းသောဝိညာဉ်တော်အားဖြင့် ပြုလုပ်တဲ့အမှုတွေကို “သန့်ရှင်းသောဝိညာဉ်တော်ရဲ့အမှု” လို့ မကြာခဏ ရည်ညွှန်းလေ့ရှိကြပါတယ်။

"ဝိညာဉ်တော်" လို့ခေါ်ပေမဲ့၊ ကိုယ်တော်ဟာ စိတ်ခံစားမှုမရှိတဲ့ စွမ်းအားတစ်ခုမျှသာ မဟုတ်ပါဘူး။ သမ္မာကျမ်းစာက ကိုယ်တော်ဟာ သုံးပါးတစ်ဆူထဲမှာပါဝင်တဲ့ ထူးခြားတဲ့ ပုဂ္ဂိုလ်တစ်ပါးဖြစ်ကြောင်း ရှင်းလင်းစွာဖော်ပြထားပါတယ်။ သန့်ရှင်းသောဝိညာဉ်တော်ကို “ကူညီမစသူ” ဒါမှမဟုတ် “နှစ်သိမ့်ပေးသူ” စတဲ့ နာမတော်တွေနဲ့လည်း မကြာခဏ ဖော်ပြလေ့ရှိပါတယ်။ ဒါ့အပြင် သန့်ရှင်းသောဝိညာဉ်တော်ဟာ ခမည်းတော်ဘုရား၊ သားတော်ဘုရားတို့နဲ့ တန်းတူညီမျှဖြစ်ပြီး၊ သူတို့ရဲ့ ဘုရားဖြစ်ခြင်း ဂုဏ်ရည်တွေဟာလည်း တူညီကာ၊ ထူးခြားစုံလင်စွာ သဘောတစ်ညီတစ်ညွတ်တည်းဖြစ်တဲ့ သုံးပါးတစ်ဆူဘုရား ဖြစ်တော်မူပါတယ်။

ကျွန်ုပ်တို့ဟာ သမ္မာကျမ်းစာရဲ့အစကတည်းက ဘုရားသခင်အကြောင်းကို ဖတ်ရှုခဲ့ရပါတယ်။ ဓမ္မဟောင်းကျမ်းမှာ သခင်ယေရှုအကြောင်း အရိပ်အမြွက်တွေကို ဖတ်ရှုရပြီး ဓမ္မသစ်ကျမ်းမှာတော့ ကိုယ်တော့်ကို ပိုမိုသိကျွမ်းလာရပါတယ်။ အခုမေးခွန်းက သမ္မာကျမ်းစာရဲ့ ဘယ်နေရာမှာ သန့်ရှင်းသောဝိညာဉ်တော်အကြောင်း သင်ဖတ်ရှုခဲ့ဖူးပါသလဲ။ အဖြေကတော့ ကျမ်းစာရဲ့အစကတည်းကပါပဲ။ ကမ္ဘာဦးကျမ်း အခန်းကြီး ၁၊ အငယ် ၂ မှာပဲ ဖန်ဆင်းရှင်ဘုရားသခင်ကို မိတ်ဆက်ပြီးနောက်၊ သန့်ရှင်းသောဝိညာဉ်တော်အကြောင်းကို ကျွန်ုပ်တို့ ဖတ်ရှုနိုင်ပါတယ်။ အဲဒီနေရာမှာ သန့်ရှင်းသောဝိညာဉ်တော်ကို ရေပြင်ပေါ်မှာ လှုပ်ရှားလျက်ရှိတဲ့ “ဘုရားသခင်၏ဝိညာဉ်တော်” လို့ ရည်ညွှန်းထားပါတယ်။ ဒါ့အပြင် သန့်ရှင်းသောဝိညာဉ်တော်ကို ဓမ္မဟောင်းကျမ်းမှာ အကြိမ်များစွာ တွေ့ရပြီး ဓမ္မသစ်ကျမ်းမှာတော့ ထို့ထက်မက အကြိမ်များစွာ တွေ့ရပါတယ်။

ဒီအပိုင်းကတော့ ဝိညာဉ်တော်ရဲ့အသီးနဲ့ ဆုကျေးဇူးများအကြောင်း ရှင်းပြတဲ့အပိုင်း ဖြစ်ပါတယ်။ "ဝိညာဉ်တော်ရဲ့ အသီး" ဆိုတာက ဘုရားသခင်နဲ့အတူ အသက်ရှင်တဲ့အခါ သင့်ရဲ့အသက်တာမှာ တဖြည်းဖြည်းပေါ်ထွန်းလာတဲ့ စရိုက်လက္ခဏာ (၉) မျိုးကို ရည်ညွှန်းပါတယ်။ "ဝိညာဉ်တော်ရဲ့ ဆုကျေးဇူး" တွေကတော့ အဓိကအားဖြင့် အသင်းတော်နဲ့ တခြားသူတွေကို တည်ဆောက်ဖို့ ရည်ရွယ်ပါတယ်။

သန့်ရှင်းသောဝိညာဉ်တော်ဟာ သင့်ဘဝကို အလွယ်တကူဖြတ်သန်းနိုင်အောင် ဒါမှမဟုတ် သင့်ရဲ့အခက်အခဲအားလုံးကို ဖယ်ရှားပေးဖို့ ကြွလာတာ မဟုတ်ပါဘူး။ တစ်ခါတစ်ရံမှာ ဝိညာဉ်တော်နဲ့အတူ အသက်ရှင်ခြင်းက သင့်ကို မသက်မသာဖြစ်စေတယ်လို့တောင် ခံစားရစေနိုင်ပါတယ်။ ဘာဖြစ်လို့လဲဆိုတော့ ဝိညာဉ်တော်ဟာ ကျွန်ုပ်တို့ကို ပိုကောင်းတဲ့လူတစ်ယောက်ဖြစ်လာဖို့ စိန်ခေါ်လေ့ရှိပြီး၊ ဒါဟာ အမြဲတမ်းမလွယ်ကူလို့ပါပဲ။

သမ္မာကျမ်းစာဟာ သင့်ဘဝကိုတိုးတက်စေဖို့ အကောင်းဆုံးလက်စွဲစာအုပ်ဖြစ်သလို၊ သန့်ရှင်းသောဝိညာဉ်တော်ကလည်း သင့်ကို အပိုဆုကြေးအဖြစ် ကောင်းချီးတွေ ပေးအပ်ပါတယ်။ အဲဒီကောင်းချီးတွေကို "ဝိညာဉ်အသီး" လို့ခေါ်ပြီး၊ ဒါဟာ သီးခြားအသီး ၉ လုံးမဟုတ်ဘဲ၊ လိမ္မော်သီးတစ်လုံးလို အစိတ်အပိုင်းများစွာပါဝင်တဲ့ အသီးတစ်လုံးနဲ့တူပါတယ်။ သင်ဟာ ဘုရားသခင်နဲ့ နီးကပ်စွာအသက်ရှင်တဲ့အခါ၊ ဝိညာဉ်အသီးဟာ သင့်ရဲ့အသက်တာထဲမှာ ပိုပြီးထင်ရှားစွာ မြင်တွေ့လာရမှာ ဖြစ်ပါတယ်။

သင်သည် သန့်ရှင်းသောဝိညာဉ်တော်ကို လက်ခံရရှိသောအခါ၊ သင်သည် အထူးဆုကျေးဇူးများ၊ အရည်အချင်းများကို လက်ခံရရှိပါလိမ့်မယ်။ ၎င်းတို့သည် သင်၌ရှိပြီးသား အရည်အချင်းများကို တိုးချဲ့ပေးသော ဆုကျေးဇူးများဖြစ်နိုင်သလို၊ အသစ်သော ဆုကျေးဇူးများလည်း ဖြစ်နိုင်ပါသည်။ ဤဆုကျေးဇူးများသည် အသင်းတော်ကို အကောင်းဆုံး အတူတကွတည်ဆောက်ရန်  ဖြစ်ပါသည်။ အသင်းတော်ကို သမ္မာကျမ်းစာထဲတွင် တစ်ခါတစ်ရံ ခန္ဓာကိုယ်နှင့် နှိုင်းယှဉ်ဖော်ပြထားပါသည်။ အစိတ်အပိုင်း တစ်ခုစီတိုင်းသည် အသုံးဝင်ပြီး ခန္ဓာကိုယ်ကို အကောင်းဆုံးအသုံးပြုနိုင်ရန်၊ အင်္ဂါချင်းဝင်များသည် အတူတကွအလုပ်လုပ်ဆောင်ကြရသည်။ နားများသည် စကားမပြောနိုင်၊ လက်များသည် မမြင်နိုင်ကြသော်လည်း အစိတ်ပိုင်းတစ်ခုခြင်းစီတိုင်းသည် မိမိတို့၏ကိုယ်ပိုင် အရည်အချင်းများရှိကြပြီး  အင်္ဂါချင်းဝင်များသည် မိမီတို့၏အရည်အချင်းများတွင် ကြီးထွားလာသောအခါ၊ ကိုယ်ခန္ဓာအဖြစ် အားလုံးအတူတကွ အောင်မြင်ကြပါသည်။

သင်ဟာ သခင်ယေရှုကို ကိုယ့်ရဲ့ကယ်တင်ရှင်အဖြစ် လက်ခံဖို့ ဆုံးဖြတ်လိုက်တဲ့အခါ၊ သင်ဆက်လက်လုပ်ဆောင်ရမယ့် ခြေလှမ်းအချို့ ရှိပါတယ်။ ပထမတစ်ခုကတော့ ကိုယ့်ရဲ့အပြစ်တွေအတွက် နောင်တရပြီး သခင်ယေရှုနောက်ကို လိုက်လျှောက်ဖို့ ရွေးချယ်ခြင်း ဖြစ်ပါတယ်။ နောက်တစ်ဆင့်ကတော့ ရေနှစ်ခြင်းခံခြင်း ဖြစ်ပါတယ်။ ဒီခြေလှမ်းကို လှမ်းခြင်းအားဖြင့် သင်ဟာ အပြစ်ခွင့်လွှတ်ခြင်းကို ရရှိပြီး သခင်ယေရှုနဲ့အတူ ဘဝသစ်ကို စတင်နိုင်မှာ ဖြစ်ပါတယ်။ ဒီလိုပြုလုပ်သူတိုင်းဟာ သန့်ရှင်းသောဝိညာဉ်တော်ကို လက်ဆောင်အဖြစ် လက်ခံရရှိကြပါတယ်။ (တမန်တော်ဝတ္ထု ၂:၃၈ JBMLE)

ဒါဟာ ခံစားချက်ပေါ်မှာ အခြေမခံပါဘူး။ သမ္မာကျမ်းစာထဲမှာ ဘုရားသခင်ပေးထားတဲ့ ကတိတော်အပေါ် ယုံကြည်စိတ်ချခြင်းနဲ့ပဲ သက်ဆိုင်ပါတယ်။ ဒါကြောင့် ထူးခြားတဲ့ခံစားချက်တစ်ခုကို မျှော်လင့်ပြီး အာရုံစိုက်နေရင် စိတ်ပျက်သွားနိုင်ပါတယ်။

သင်ဟာ ဝိညာဉ်တော်ကို ဘယ်လိုလက်ခံရမလဲဆိုတာကို ယခုသိပြီဆိုတော့၊ သင့်ဘဝမှာ ဝိညာဉ်တော်ကို ပိုပြီးဘယ်လိုသတိပြုမိနိုင်မလဲ။ သန့်ရှင်းသောဝိညာဉ်တော်ဟာ သင့်ဘဝထဲကို အတင်းအကြပ်ဝင်ရောက်လာမှာမဟုတ်ဘဲ၊ သင်နေရာပေးမှသာ ဝင်ရောက်လာမှာ ဖြစ်ပါတယ်။ ဒါကြောင့် အရေးကြီးဆုံးအရာက ဆုတောင်းခြင်း ဖြစ်ပါတယ်။ သင့်ဘဝထဲကိုဝင်ရောက်ပြီး အလုပ်လုပ်ဖို့ ကိုယ်တော်ကို တောင်းဆိုပါ။ ဝိညာဉ်တော်ရဲ့ အကူအညီ၊ ဉာဏ်ပညာ၊ ငြိမ်သက်ခြင်းနဲ့ ပြည့်ဝခြင်းတွေအတွက် တောင်းဆိုပါ။ ဝိညာဉ်တော်ဟာ သင်ဖိတ်ခေါ်တဲ့အခါ အမြဲလက်ခံပါလိမ့်မယ်။

နောက်တစ်နည်းကတော့ သင့်ရဲ့ဆုကျေးဇူးတွေကို အသုံးပြုခြင်း ဖြစ်ပါတယ်။ သင့်ကို အားအင်ဖြစ်စေတဲ့အရာ၊ သင်ကြိုက်နှစ်သက်တဲ့အရာတွေကို စမ်းသပ်ကြည့်ပါ။ အဲဒီနည်းနဲ့ သင့်ရဲ့ဆုကျေးဇူးကို သိရှိနိုင်ပြီး၊ အဲဒီဆုကျေးဇူးတွေကို စတင်အသုံးပြုနိုင်ပါတယ်။

ယခင်က ဖော်ပြခဲ့သလိုပဲ၊ သန့်ရှင်းသောဝိညာဉ်တော်နဲ့အသက်ရှင်ခြင်းဟာ အမြဲတမ်း သက်သောင့်သက်သာရှိမှာ မဟုတ်ပါဘူး။ ဝိညာဉ်တော်ဟာ သင့်ဘဝမှာ ရှင်းလင်းပေးလိမ့်မယ်။ အနာဟောင်းတွေကို ကုစားပေးပြီး အရာရာကို ပိုကောင်းအောင် လုပ်ဆောင်ပေးပါလိမ့်မယ်။ ဒါဟာ အစပိုင်းမှာ မသက်မသာဖြစ်စေနိုင်ပေမဲ့၊ နောက်ဆုံးမှာတော့ သင့်ကို စစ်မှန်တဲ့ သက်သာခြင်းကို ရရှိစေပါလိမ့်မယ်။