❤️ သင့်ကို အရင်ဆုံး ချစ်တော်မူခဲ့သူ

မိတ်ဆွေ ရေ…

တစ်ခါတလေ ကျွန်မတို့က “ဘုရားသခင် … ကိုယ်တော့်ကို ကျွန်ုပ်ချစ်တယ်” လို့ ပြောတတ်ကြပါတယ်။

ဒါပေမယ့် ဒီနေ့ ခဏရပ်ပြီး စဉ်းစားကြည့်ရအောင်—

အဲ့ဒီချစ်တဲ့ နှလုံးသားကို ဘယ်သူပေးခဲ့လို့ ကျွန်မ တို့ ချစ်နိုင်တာပါလဲ ? 

ကျွန်မတို့က ဘုရားသခင်ကို အရင်ရှာခဲ့လို့လား ?ကျွန်မတို့က ဘုရားသခင်ကို အရင်စပြီး ချစ်ခဲ့လို့လား?

သမ္မာကျမ်းစာက ဒီလိုပြောပါတယ်—

“ဘု​ရား​သ​ခင်​သည် ငါ​တို့​ကို​ရှေ့​ဦး​စွာ ချစ်​တော်​မူ​သော​ကြောင့်၊ ငါ​တို့​သည် ဘု​ရား​သ​ခင်​ကို​ချစ်​ကြ၏။-” ၁ ရှင်ယောဟန်‬ ‭4‬:‭19‬ ‭JBMLE‬‬

ဒီကျမ်းပိုဒ်က ချစ်ခြင်းမေတ္တာရဲ့ အစပြုသူဟာ ကျွန်မတို့မဟုတ်ဘူး ဆိုတာကို သတိပေးနေပါတယ် ❤️

ဘုရားသခင်ကိုယ်တော်တိုင်က အရင်ချစ်တော်မူခဲ့ပါတယ်။

ကျွန်မတို့ မရှာဖွေခင်—သူက ကျွန်မတို့ကို ရှာဖွေတော်မူခဲ့ပါတယ်။

ကျွန်မတို့ မသိသေးခင်—သူက ကျွန်မတို့ကို သိတော်မူခဲ့ပါတယ်။

ကျွန်မတို့ သူ့ကို မချစ်နိုင်သေးခင်—သူက ကျွန်မတို့ကို အရင်ချစ်တော်မူခဲ့ပါတယ်။

ဒါဟာ ကျေးဇူးတော် ပဲဖြစ်ပါတယ် ။

ဘုရားသခင်ရဲ့ ချစ်ခြင်းမေတ္တာဟာ ကျွန်မတို့ရဲ့ ကောင်းမြတ်မှု၊ ပြည့်စုံမှု၊ ထိုက်တန်မှုတို့ကို စောင့်ပြီးမှ စတင်လာတာ မဟုတ်ပါဘူး။ ဒါကြောင့် သင်အားနည်းတဲ့ ၊ အလုပ်ပင်ပန်းတဲ့ ၊ သင်ကိုယ်တိုင်ကိုတောင် နားမလည်နိုင်တဲ့ အချိန်မှာ “ဘုရားသခင်က ငါ့ကို ဘယ်လောက်ထိ ချစ်လဲ” ဆိုတာကို ပြန်သတိရလိုက်ပါ။

သူ့ရဲ့ချစ်ခြင်းမေတ္တာက သင့်အပေါ်မှာ အချိန်တိုင်း ရှိနေပါတယ်။ 🤍

ဘာကြောင့်လဲဆိုတော့ သင့်အပေါ်ထားတဲ့ သူ့ရဲ့ချစ်ခြင်းဟာ သင့်ရဲ့လုပ်ဆောင်ချက်ကနေ စတင်တာမဟုတ်ဘဲ၊ သူ့ရဲ့သဘောသဘာဝထဲကနေ စတင်တာဖြစ်လို့ပါ။

မနေ့က ကျွန်မတို့ “ဘုရားသခင်သည် ချစ်ခြင်းမေတ္တာဖြစ်တော်မူ၏။” ဆိုတဲ့ ကျမ်းပိုဒ်ကို ဆင်ခြင်ခဲ့ကြသလို ဒီနေ့မှာတော့ “ငါက သူ့ကို အရင်ချစ်ခဲ့တာမဟုတ်ဘူး။ သူက ငါ့ကို အရင်ချစ်ခဲ့တာပဲ” ဆိုတဲ့ အရာကို နှလုံးသွင်းဖို့ပဲ ဖြစ်ပါတယ် ။

သင်ဟာ ချစ်ခြင်းကို ရှာဖွေနေရတဲ့သူတစ်ယောက် မဟုတ်ပါဘူး။


သင်ဟာ အရင်ဆုံး အချစ်ခံရတဲ့သူတစ်ယောက်ပါ 🤍