သင့်ကို နာကျင်စေခဲ့တဲ့သူအတွက် ဆုတောင်းပေးနိုင်မလား?

မိတ်ဆွေ ရေ… တစ်ယောက်ယောက်ကို ခွင့်လွှတ်ဖို့တောင် ခက်ခဲပါတယ်။

ဒါပေမဲ့ ယေရှုက အဲ့ဒီထက် ပိုနက်တဲ့နေရာတစ်ခုကို ကျွန်တော်တို့ကို ခေါ်တော်မူပါတယ်။

ကိုယ့်ကို နာကျင်စေခဲ့တဲ့သူအတွက် ဆုတောင်းပေးဖို့ပါ။

ယေရှုက—

“ငါ​ပ​ညတ်​သည်​ကား၊ သင်​တို့​သည် ကောင်း​ကင်​ဘုံ၌ ရှိ​တော်​မူ​သော သင်​တို့​အ​ဘ၏ သား​ဖြစ်​လို​သော​ငှာ၊ သင်​တို့၏​ရန်​သူ​တို့​ကို ချစ်​ကြ​လော့။ သင်​တို့​ကို ကျိန်​ဆဲ​သော​သူ​တို့​အား မေ​တ္တာ​ပို့​ကြ​လော့။ သင်​တို့​ကို မုန်း​သော​သူ​တို့​အား ကျေး​ဇူး​ပြု​ကြ​လော့။ သင်​တို့​ကို နှောင့်​ယှက်​ညှဉ်း​ဆဲ​သော သူ​တို့​အ​ဖို့ ဘု​ရား​သ​ခင်​ကို ဆု​တောင်း​ကြ​လော့။-” ရှင်မဿဲ 5:44

လို့ သင်ပေးခဲ့ပါတယ်။

ဘာကြောင့် ယေရှုက ဒီလောက်အထိ လုပ်ခိုင်းရတာလဲ?

ဘာကြောင့်လဲဆိုတော့ ခွင့်လွှတ်ခြင်းရဲ့ ပန်းတိုင်က သူ့အပေါ် လက်စားမချေတော့ရုံသာ မဟုတ်ပါဘူး။ ကိုယ့်နှလုံးသားက နာကြည်းမှုရဲ့ ပုံသဏ္ဌာန် မဖြစ်သွားဖို့ပါ။

ကိုယ့်ကို နာကျင်စေခဲ့သူကြောင့် ကိုယ်ပါ ခါးသီးတဲ့လူတစ်ယောက် ဖြစ်သွားဖို့ မလိုပါဘူး။

ဒါကြောင့် သူ့အတွက် ဆုတောင်းတဲ့အခါ

သူလုပ်ခဲ့တာကို မှန်တယ်လို့ ပြောနေတာ မဟုတ်ပါဘူး။

“သူလုပ်ခဲ့တဲ့အရာက ကျွန်တော့်နှလုံးသားကို ဘယ်လိုလူတစ်ယောက်ဖြစ်လာမလဲဆိုတာ မဆုံးဖြတ်စေရဘူး” လို့ ကြေညာခြင်းဖြစ်ပါတယ်။

မိတ်ဆွေရေ…

ဒီနေ့ သူ့အတွက် စကားအများကြီး ဆုတောင်းနိုင်ဖို့ မလိုပါဘူး။

ဒီလောက်နဲ့ စတင်လို့ရပါတယ်

“ယေရှု… သူ့ကို ကိုယ်တော်ရဲ့ လက်ထဲ အပ်ပါတယ်။ သူ့အသက်တာထဲမှာလည်း ကိုယ်တော် အလုပ်လုပ်ပေးတော်မူပါ။ ကျွန်တော့်နှလုံးသားကိုတော့ နာကြည်းမှုနဲ့ မပြည့်စေဘဲ ကိုယ်တော်ရဲ့ ချစ်ခြင်းနဲ့ ပြည့်စေတော်မူပါ။”

တစ်ခါတစ်ရံ သူ့အတွက် ဆုတောင်းပေးနိုင်လာခြင်းဟာ သူပြောင်းလဲသွားပြီဆိုတဲ့ သက်သေမဟုတ်ပါဘူး။

သင့်နှလုံးသားကို ဘုရားသခင် ပြောင်းလဲနေပြီဆိုတဲ့ သက်သေပါ။