ခွင့်လွှတ်ပြီးသားပေမဲ့ ဘာကြောင့် ပြန်နာကျင်နေရတာလဲ? 

မိတ်ဆွေ ရေ… ခွင့်လွှတ်ပြီးသား လူတစ်ယောက်ရဲ့ နာမည်ကို ပြန်ကြားလိုက်ရုံနဲ့ နာကျင်မှုတွေ ပြန်ပေါ်လာဖူးပါသလား? ကျွန်တော်လည်း ကြုံဖူးပါတယ်။ တစ်နေ့ မိတ်ဆွေတစ်ယောက်နဲ့ စကားပြောနေတုန်း အတိတ်မှာ ကျွန်တော့်ကို အရမ်းနာကျင်စေခဲ့တဲ့ လူတစ်ယောက်ရဲ့ နာမည်ကို ကြားလိုက်ရပါတယ်။ ကျွန်တော် သူ့ကို ခွင့်လွှတ်ပြီးသားပါ။ ဒါပေမဲ့ နာမည်တစ်ခွန်းက ဒဏ်ရာဟောင်းကို ပြန်နာစေခဲ့တယ်။ အဲ့ဒီနေ့မှာ ကျွန်တော် နားလည်လာတာတစ်ခုရှိပါတယ်။ ဒဏ်ရာ ပြန်နာလာတာက ခွင့်လွှတ်ခြင်း ပျက်သွားတာ မဟုတ်ပါဘူး။ ခွင့်လွှတ်ခြင်းက ဖြစ်ခဲ့တဲ့အရာကို မေ့ပစ်ခြင်း မဟုတ်သလို နာကျင်မှုကို ချက်ချင်းပျောက်စေခြင်းလည်း မဟုတ်ပါဘူး။ ခွင့်လွှတ်ခြင်းဆိုတာ— “ဒီလူနဲ့ ဒီနာကျင်မှုကို ဘုရားသခင်ရဲ့ လက်ထဲ အပ်ပါတယ်။ ငါကိုယ်တိုင် အပြစ်ပြန်မတုံ့တော့ဘူး” လို့ ဆုံးဖြတ်ခြင်းပါ။ သမ္မာကျမ်းစာက—“ချစ်သူတို့၊ သူတစ်ပါးသည် သင်တို့ကို ပြစ်မှားလျှင်၊ ကိုယ်တိုင် အပြစ်ပြန်၍ မတုံ့ကြနှင့်။ အမျက်တော်ကို အခွင့်ပေးကြလော့။” ရောမ ၁၂:၁၉  လို့ ဆိုထားပါတယ်။ ဒါကြောင့် အဲ့ဒီနေ့မှာ ကျွန်တော် ဒီလိုဆုတောင်းခဲ့ပါတယ်။ “ဘုရားသခင်… ကျွန်တော် သူ့ကို ခွင့်လွှတ်ပြီးသားပါ။ ဒါပေမဲ့ ဒီနေ့ ပြန်နာကျင်နေပါတယ်။ ဒီနာကျင်မှုနဲ့ ဒီလူကို ကိုယ်တော်ရဲ့ လက်ထဲ ထပ်ပြီး အပ်ပါတယ်။” မိတ်ဆွေ ရေ… Healing လို့ခေါ်တဲ့ အကောင်းအတိုင်း ပြန်လည်ကျန်းမာခြင်းက အချိန်ယူနိုင်ပါတယ်။ ခွင့်လွှတ်ခြင်းကတော့ နာကျင်မှု ပြန်ပေါ်လာတိုင်း နာကြည်းမှုကို ပြန်မကိုင်ဖို့ ရွေးချယ်နိုင်ပါတယ်။ ဒဏ်ရာဟောင်း ပြန်နာလာရင် ကိုယ့်ကိုယ်ကို “ငါ တကယ်ခွင့်မလွှတ်ခဲ့ဘူးလား?” လို့ အပြစ်မတင်ပါနဲ့။ အဲ့ဒီအစား— “ဒီနာကျင်မှုကို ဘုရားသခင်ရဲ့ လက်ထဲ ထပ်ပြီး အပ်မယ်” လို့ ဆုံးဖြတ်လိုက်ပါ။ ခွင့်လွှတ်ခြင်းက အတိတ်ကို မပြောင်းလဲနိုင်ပါဘူး။ ဒါပေမဲ့ အတိတ်က သင့်ရဲ့ ဒီနေ့ကို ဆက်ပြီး ထိန်းချုပ်လို့ မရတော့ဘူးပေါ့။ ဒီနေ့ ကျွန်တော်တို့ အတူတူ ဆုတောင်းကြရအောင် “အဖဘုရား… ဒဏ်ရာဟောင်းတွေ ပြန်နာလာတဲ့အခါ နာကြည်းမှုကို ပြန်မကိုင်ဘဲ ကိုယ်တော်ရဲ့ လက်ထဲ ထပ်ပြီး အပ်နိုင်ဖို့ ကူညီပေးတော်မူပါ။ ကျွန်ုပ် မပြောင်းလဲနိုင်တဲ့ အတိတ်ကို ကိုယ်တော်ထံ အပ်ပြီး ကိုယ်တော်ပေးတဲ့ လွတ်လပ်ခြင်းထဲမှာ အသက်ရှင်နိုင်ဖို့ ကျေးဇူးတော်ပေးတော်မူပါ။ ယေရှုနာမ၌ ဆုတောင်းပါ၏။ အာမင်။