ဘုရားသခင် တံခါး ဖွင့်ပေးနေပါတယ် …
တမန်တော်ကြီး ရှင်ပေါလုဟာ ဘုရားသခင်၏ နိုင်ငံတော်အတွက် ကြီးစွာသောအမှုကို ဆောင်ရွက်ခဲ့သူ ဖြစ်သလို တစ်ဖက်မှာလည်း တဲရှင်ချုပ်တဲ့ အလုပ်ကို ကိုယ်တိုင်ကိုယ်ကျ ပြုလုပ်ခဲ့သူ ဖြစ်ပါတယ် ။
ကျမ်းစာကို သေချာ လေ့လာကြည့်ရင် ပေါလုဟာ ကောရိန္သုမြို့ကို ရောက်ရှိတဲ့အခါ အတတ်ပညာချင်း တူတဲ့ အာကုလ နှင့် ပြစ်ကိလ ဆိုတဲ့ ဇနီးမောင်နှံနဲ့ ဆုံစည်းခဲ့ရပါတယ် ။ ပေါလုဟာ သူတို့နဲ့အတူ တည်းခိုပြီး တဲရှင်ချုပ်တဲ့ အလုပ်ကို အတူတူ လုပ်ကိုင်ခဲ့ပါတယ် ။ အဲဒီလို သစ္စာရှိစွာ လုပ်ကိုင်ရင်း ၊ ဥပုသ်နေ့တိုင်းမှာလည်း တရားဇရပ်ကို သွားရောက်ပြီးတော့ ယုဒလူတွေရော ဟေလသလူတွေကိုပါ သခင်ယေရှုခရစ်တော် အကြောင်း ရဲရဲရင့်ရင့် ဟောပြောဆွေးနွေးပြီး အမှုဆောင်ခဲ့တာ ဖြစ်ပါတယ် ။
ဘုရားသခင်ဟာ ပေါလုရဲ့ အဲဒီ့ တဲရှင်ချုပ်တဲ့ အလုပ်အားဖြင့်လည်း ဧဝံဂေလိတရား ဝေမျှဖို့ အံ့ဩဖွယ်ရာ တံခါးတွေ ဖွင့်ပေးခဲ့တာကိုလည်း တွေ့ရတာ ဖြစ်ပါတယ် ။
ဒီနေ့မှာ မေးခွန်းလေးတစ်ခု မေးချင်ပါတယ် …
မိတ်ဆွေ ရော ဘာအလုပ်လုပ်တွေ လုပ်ဆောင်နေပါသလဲ ?
သင့်ရဲ့ လုပ်ငန်းခွင် ၊ ရောက်လေရာ မြို့ရွာတိုင်းမှာ ဘုရားသခင်က အမှုဆောင်ခြင်းနဲ့ သက်ဆိုင်တဲ့ တံခါးတွေ ဖွင့်ပေးထားပါတယ် ။ အမှုဆောင်ခြင်းဆိုတာ ကျွန်မတို့လို အချိန်ပြည့်အမှုဆောင်တွေပဲ လုပ်ရတာ မဟုတ်ပါဘူး ။
သင်သည်လည်း ဘုရားသခင်ရဲ့ အမှုတော်ဆောင် ဖြစ်ပါတယ် ။ သင်သွားရမယ့် နေရာတိုင်းမှာ ဘုရားသခင်ဟာ လွတ်မြောက်ခြင်းနဲ့ ဆိုင်သော ၊ ကျန်းမာခြင်းနဲ့ဆိုင်သော ၊ ငြိမ်သက်ခြင်းနဲ့ဆိုင်သော တံခါးတွေကို သူကိုယ်တိုင် ဖွင့်ထားပေးပါတယ် ။
သင်ကိုယ်တိုင်က အဲ့ဒီ တံခါးပေါက်တွေက ငါ့အတွက် ဖြစ်တယ်ဆိုတာ ယုံကြည်ပြီး အမှုဆောင်ခြင်းအရာမှာ ရဲရင့်စွာ လုပ်ဆောင်လိုက်ပါ ။ ဒါလေးကို စိတ်ချပါ …
သင်နှင့် အတူ ဘုရားသခင် ရှိနေပါတယ် မိတ်ဆွေ ရေ… 🤍
