လက်လှမ်းမမှီလောက်အောင် ဝေးကွာ မနေပါဘူး !
ဘုရားသခင်က သင့်ကို လောကရဲ့ အမြင်မှာ လုံးဝမဖြစ်နိုင်ဘူးလို့ ထင်ရတဲ့ အိပ်မက်ရူပါရုံတွေကို ပေးထားပါသလား? အဲ့ဒီရူပါရုံက လက်လှမ်းမမီနိုင်ဘူးလို့ ထင်နေရပါသလား ?
ဒီနေ့မှာ ကျွန်မခွန်အားပေးချင်တာကတော့ ဘုရားသခင်ကို ယုံကြည်လိုက်ပါ၊ မထိတ်လန့်လိုက်ပါနဲ့!
ဓမ္မဟောင်းကျမ်းစာထဲမှာ ဘုရားသခင်က နောဧကို စကားပြောပြီး အလွန်ကြီးမားတဲ့ သင်္ဘောကြီးတစ်စင်း ဆောက်ဖို့နဲ့ တိရိစ္ဆာန် အမျိုးအစားတိုင်းကနေ အထီးတစ်ကောင်၊ အမတစ်ကောင်စီ ထည့်ဖို့ ခိုင်းခဲ့ပါတယ်။ ဘာကြောင့်လဲဆိုတော့ တစ်ကမ္ဘာလုံးကို ရက်သတ္တပတ်ပေါင်းများစွာ ရေလွှမ်းမိုးတော့မှာ မို့လို့ပါ...
ဒီထူးဆန်းတဲ့ တောင်းဆိုမှုအပေါ် နောဧရဲ့ တုံ့ပြန်မှုက ဘယ်လိုရှိမလဲဆိုတာ ဖတ်ကြည့်ရအောင်…
“မှာထားတော်မူသည်အတိုင်းလည်း နောဧပြုလေ၏။” ကမ္ဘာဦး 6:22
နောဧဟာ ဘုရားသခင်ရဲ့ အမိန့်တော်ကို လက်တွေ့ အကောင်အထည် ဖော်ခဲ့ပါတယ်! သူ့မှာ မေးခွန်းတွေ အများကြီးရှိကောင်းရှိခဲ့ပါလိမ့်မယ်... ကျမ်းစာမှာတော့ အဲဒီအကြောင်း မဖော်ပြထားပေမယ့် သူဟာ ဘုရားသခင်ရဲ့ အလိုတော်အပေါ် ချက်ချင်း တုံ့ပြန်လုပ်ဆောင်ခဲ့တယ်ဆိုတာ တွေ့ရပါတယ် ။
လူသားတွေရဲ့ အမြင်နဲ့ အဲဒီခေတ်အခြေအနေအရ ဘုရားသခင်ရဲ့ အမိန့်တော်က တွေးကြည့်ရင် ဘယ်လိုမှ မဖြစ်နိုင်ပါဘူး ။ ဒါပေမယ့် ဘုရားသခင်ဟာ ပစ္စုပ္ပန်ရဲ့ ဘုရားသခင်တင် မဟုတ်ပါဘူး... ထာဝရကာလရဲ့ ဘုရားသခင်လည်း ဖြစ်ပါတယ်! ကိုယ်တော့်ရဲ့ အမြင်နဲ့ အရာရာကို သိမြင်နိုင်စွမ်းဟာ အချိန်ကာလရဲ့ ကန့်သတ်မှုထဲမှာ မရှိပါဘူး …
ကျွန်မကိုယ်တိုင်လည်း "နေ့စဉ်ကောင်းကြီးမင်္ဂလာ" မှာ ယခုလို မိတ်ဆွေ အတွက် ခွန်အားပေးတည်ဆောက်ခွင့် ရနေတာကလည်း ကျွန်မအနေနဲ့ဆို မဖြစ်နိုင်တဲ့ ရူပါရုံ ထဲမှာ ရှိနေခြင်းပဲ ဖြစ်ပါတယ် ။
မိတ်ဆွေ ရေ... ကြောက်ရွံ့မှုတွေကြောင့် လက်မလျှော့လိုက်ပါနဲ့...
ဆုတောင်းပြီး ရှေ့ကို တစ်လှမ်းတိုးလိုက်ပါ! ဘုရားသခင် သင့်ထဲမှာ ထည့်ပေးထားတဲ့ ရူပါရုံဟာ လူများစွာကို ကယ်တင်ပေးမယ့် "နောဧသင်္ဘော" လိုမျိုး ဖြစ်နေနိုင်ပါတယ်။ မနက်ဖြန်မှာ ဝိညာဉ်ပေါင်းများစွာကို ကယ်တင်ဖို့ ဘုရားသခင် အသုံးပြုမယ့် နည်းလမ်းလည်း ဖြစ်နေနိုင်ပါတယ်!
မသေချာ မရေရာခြင်းနဲ့တွေဝေမနေပါနဲ့တော့... ဘုရားသခင်ရဲ့ လက်ကို မြဲမြဲဆုပ်ကိုင်ပြီး သင့်ကို ဘုရားပေးထားတဲ့ ရူပါရုံတွေကို လက်တွေ့ဖြစ်လာအောင် ယုံကြည်ခြင်းနဲ့ခြေလှမ်းလိုက်ပါ !
ဘုရားသခင်၌ မဖြစ်နိုင်သောအရာ မရှိပါဘူး 🤍
