ဘုရားသခင်က သစ္စာရှိတယ်
မိတ်ဆွေရေ… ကမ္ဘာဦးအစ ဖန်ဆင်းခြင်းကတည်းက ဘုရားသခင် မိန့်တော်မူခဲ့တဲ့ စကားတစ်ခွန်းဟာ ဒီနေ့အချိန်အထိ မြေကြီးပေါ်မှာ အသက်ရှင်လှုပ်ရှားပြီး တန်ခိုးပါဝင်နေဆဲဆိုတာ သင် စဉ်းစားကြည့်ဖူးပါသလား?
လူတွေရဲ့ စကားဟာ အချိန်တိုအတွင်း မေ့ပျောက်သွားတတ်ပေမဲ့ ဘုရားသခင်ရဲ့ နှုတ်ကပတ်တော်ကတော့ အချိန်ကာလ ထောင်ပေါင်းများစွာ ကုန်လွန်သွားခဲ့ရင်တောင်မှ အစဉ်အမြဲ တည်ရှိပြီး အသက်ဝင်နေဆဲ ဖြစ်ပါတယ်။
“တစ်ဖန်ဘုရားသခင်က၊ မြေသည် မြက်ပင်ကိုလည်းကောင်း၊ စပါးသီးကိုဖြစ်စေသော စပါးပင်ကိုလည်းကောင်း၊ မြေပေါ်မှာ မျိုးစေ့ပါလျက် သစ်သီးမျိုးကိုဖြစ်စေသော သစ်ပင်ကိုလည်းကောင်း၊ ပေါက်စေဟု အမိန့်တော်ရှိသည်အတိုင်း ဖြစ်လေ၏။ မြေသည်မြက်ပင်ကိုလည်းကောင်း၊ စပါးသီးမျိုးကို ဖြစ်စေသော စပါးပင်ကိုလည်းကောင်း၊ မိမိ၌ မျိုးစေ့ပါလျက် သစ်သီးမျိုးကိုဖြစ်စေသော သစ်ပင်ကိုလည်းကောင်း ပေါက်စေ၏။” ကမ္ဘာဦး 1:11-12
စကြဝဠာကြီးတစ်ခုလုံးကို ထိန်းချုပ်ထားတဲ့ ဘုရားသခင်ရဲ့ နှုတ်ကပတ်တော်ဟာ ဒီနေ့အချိန်အထိ နာခံကျေပွန်လျက်ရှိရင်... သင့်အသက်တာအတွက် ကိုယ်တော် ပေးထားတဲ့ ကတိတော်တွေကော အချည်းနှီး ဖြစ်သွားနိုင်ပါ့မလား? လုံးဝ မဖြစ်နိုင်ပါဘူး!
“ထိုအတူ ငါ၏နှုတ်ကပတ်စကားသည် ဖြစ်လိမ့်မည်။ အကျိုးမရှိဘဲ ငါ့ထံသို့မပြန်ရ။ ငါ့အလိုကို ပြည့်စုံစေမည်။ ငါစေခိုင်းသောအမှု၌ အောင်လိမ့်မည်။” ဟေရှာယ 55:11
မိတ်ဆွေရေ… ဘုရားသခင်ရဲ့ နှုတ်ကပတ်တော်ဟာ သင့်အတွက် အချည်းနှီး ပြန်မလာပါဘူး။ ကိုယ်တော် ရည်ရွယ်ထားသမျှ အရာအားလုံးကို သင့်အသက်တာထဲမှာ အကောင်အထည်ဖော် ဆောင်ရွက်ပေးမှာ ဖြစ်ပါတယ်။
တစ်ခါတစ်ရံမှာ အခြေအနေတွေက မျှော်လင့်သလို ဖြစ်မလာသေးတာ၊ အချိန်တွေ ကြန့်ကြာနေတာကြောင့် သင့်စိတ်ထဲမှာ "ဘုရားသခင် ငါ့ကို မေ့သွားပြီလား" ဆိုတဲ့ သံသယတွေ ဝင်လာကောင်း ဝင်လာပါလိမ့်မယ်။ ဒါပေမဲ့ ဘုရားသခင်ရဲ့ အချိန်ဇယားဟာ ဘယ်တော့မှ မလွဲချော်ပါဘူး။
“ထိုရူပါရုံသည် ချိန်းချက်သော အချိန်နှင့်ဆိုင်၍ အမှုကုန်ရသောကာလကို ဆိုလို၏။ မုသားနှင့် ကင်းလွတ်၏။ ဆိုင်းသော်လည်း မျှော်လင့်လော့။ နောက်မကျဘဲ ဧကန်အမှန်ရောက်လိမ့်မည်။” ဟဗက္ကုတ် 2:3
ဘုရားသခင်ဟာ နှုတ်တော်ဖြင့် မိန့်တော်မူရုံတင်မကဘဲ သူ့ရဲ့ လက်တော်အားဖြင့်ပါ ပြည့်စုံစေတော်မူသော သစ္စာရှိသော ဘုရားဖြစ်ပါတယ်။
ဒါကြောင့် ဒီနေ့မှာ သံသယရဲ့ အသံတွေကို နားမထောင်ပါနဲ့တော့။ စိုးရိမ်ကြောက်ရွံ့ခြင်းအတွက် တံခါးကို အပြီးတိုင် ပိတ်ထားလိုက်ပါ။ သင့်အသက်တာပေါ်မှာ ဘုရားသခင် ပေးထားတဲ့ ကတိတော်တိုင်းဟာ တစ်ခုမှ ကျန်ရစ်မသွားဘဲ သင့်မျက်စိရှေ့မှာတင် ပြည့်စုံလာတာကို သင် ကိုယ်တိုင်တိုင် တွေ့မြင်ရတော့မှာ ဖြစ်ပါတယ်။
ဒီနေ့မှာ ဘုရားသခင်ရဲ့ ကတိတော်တွေကို စိတ်ချယုံကြည်စွာနဲ့ မင်္ဂလာရှိသော နေ့ရက်သစ်ကို ရဲရင့်စွာ စတင်လိုက်ပါ!
