ယေရှုခရစ်တော်နှင့်အတူ အနားယူပါ ! 

ဒီတစ်ပါတ်တာ မှာ “ယေရှုရစ်တော်နှင့်အတူ” ဆိုတဲ့ ခေါင်းစဉ်နဲ့ နှုတ်ကပါတ်တော်ကို လေ့လာနေကြတာ ဖြစ်ပြီး ဒီနေ့ကတော့ နောက်ဆုံးနေ့ ဖြစ်ပါတယ် ။ 

တစ်ခါတလေမှာ ကျွန်မတို့ရဲ့ ကွန်ပျူတာတွေ ၊ ဖုန်းတွေဟာ အလုပ်တွေ အရမ်းများလာတဲ့အခါ လေးလံလာတတ်ပါတယ်။ ဒီလိုဖြစ်လာရင် အဖြေကတော့ Restart (ပြန်လည်စတင်ခြင်း) လုပ်လိုက်ဖို့ပါပဲ။ Screen ဟာ စက္ကန့်အနည်းငယ်လောက် မှောင်သွားပြီးနောက် စနစ်က သင့်ကို စကားဝှက် ပြန်တောင်းပါလိမ့်မယ်။ Restart လုပ်ပြီးနောက်မှာ စက်ဟာ ပိုမိုမြန်ဆန် ကောင်းမွန်စွာ အလုပ်လုပ်နိုင်တာကို တွေ့ရပါလိမ့်မယ်။

အဲ့လိုပဲ ကျွန်မတို့ အသက်တာမှာလည်း အနားယူချိန်က လိုအပ်ပါတယ် ။ မနားမနေပဲ ကိုယ့်ရဲ့ အသက်တာကို မောင်းနှင်နေခြင်းက စက်လေးနေတဲ့ ဖုန်းတစ်လုံးကို အပူခံပြီး ဆက်သုံးနေတာနဲ့ တူပါတယ် ။ ဖုန်းက မလုပ်ဆောင်နိုင်တာ မဟုတ်ပါဘူး ။ ခဏလေးအနားပေးဖို့ လိုအပ်နေတာပါ ။ 

အနားယူခြင်းလို့ ပြောတဲ့အခါ မိမိစိတ်ကြိုက် လုပ်ချင်တာတွေလုပ် ပြီး လူတွေရဲ့ အဝေး ၊ ဘုရားရဲ့ အဝေးမှာ နေလိုက်ခြင်းကို ပြောတာမဟုတ်ပါဘူး ။ စိတ်နဲ့ ခန္ဓာ အနားရဖို့ အပန်းဖြေ ခရီး (သို့) အိမ်မှာ တနေကုန် အိပ်ရင်း နဲ့ အနားယူသည့်တိုင် သင့်ရဲ့ ဝိညာဉ်ကတော့ ဘုရားရဲ့ မျက်မှောက်တော်က လွဲရင် ဘယ်နေရာမှာမှ အနားမရပါဘူး …

ဒါကြောင့် နားတဲ့အခါ သခင် နဲ့နားတတ်ဖို့လိုပါတယ် ။ ကျွန်မတို့ သခင်ယေရှုဟာ ကျွန်မတို့နဲ့ အတူ အချိန်ကုန်ဆုံးချင်တဲ့ ဘုရားဖြစ်ပါတယ် ။ 

သာယာတဲ့ နေရာလေးကို ကြည့်ရင်း အတူတူ ဖြတ်သန်းချင်တယ်

စာအတူတူ ဖတ်ရင်း သင့်ကို စကားပြောချင်တယ် 

သင်နဲ့ အနီးဆုံးမှာရှိရင်းနဲ့ သင်နဲ့ စကားအပြန်အလှန် ပြောချင်သော သင့်ကို အချစ်ရဆုံး ၊ တန်ဖိုးအထားဆုံး ဘုရားသခင် ဖြစ်ပါတယ် ။

ဒါကြောင့် ဒီလို အနားယူခြင်းမျိုး သင့်အသက်တာထဲမှာ လိုကို လိုအပ်နေပါတယ် …

ဘုရားသခင် ကိုယ်တိုင်လည်း အနားယူခဲ့တယ်ဆိုတာ သင် သိပါသလား? ကမ္ဘာကြီးကို ခြောက်ရက်တိုင်တိုင် ဖန်ဆင်းပြီးနောက် ခုနစ်ရက်မြောက်နေ့မှာ ကိုယ်တော် ကိုယ်တိုင် အနားယူခဲ့ပါတယ်။ အဲဒီနောက် ပညတ်တော်ဆယ်ပါးမှာလည်း ကိုယ်တော့်ရဲ့ လူမျိုးတွေအတွက် အနားယူခြင်းဖြစ်တဲ့ “ဥပုသ်နေ့” ကို ပြဌာန်းပေးခဲ့ပါတယ်။

သင် ပင်ပန်းနွမ်းနယ်နေပါသလား? ဝန်လေးနေပါသလား? အားအင်ကုန်ခမ်းနေပါသလား? အခုပဲ ယေရှုထံသို့ လာပါ။ 

“ဝန်​လေး၍ ပင်​ပန်း​သော​သူ​အ​ပေါင်း​တို့၊ ငါ့​ထံ​သို့ လာ​ကြ​လော့။ ငါ​သည် ချမ်း​သာ​ပေး​မည်။-” ရှင်မဿဲ‬ ‭11‬:‭28‬ 

ဒီနှုတ်ကပါတ်တော်အတိုင်း ယေရှုဘုရားဟာ သင့်ရဲ့ သိုးထိန်းဖြစ်ပြီး သင့်ကို ခန္ဓာပိုင်းဆိုင်ရာ အနားယူခြင်းသာမက စိတ်ပိုင်းဆိုင်ရာနဲ့ ဝိညာဉ်ပိုင်းဆိုင်ရာ အနားယူခြင်းကိုပါ ပေးပါလိမ့်မယ်။

 “သ​စ္စာ​စောင့်၍ ဖြောင့်​မတ်​သော​လူ​မျိုး​ဝင်​ပါ​စေ။ စိတ်​နှ​လုံး​တည်​ကြည်​သော​သူ​သည် ကိုယ်​တော်၌ ခို​လှုံ​သော​ကြောင့်၊ ငြိမ်​သက်​ခြင်း​သက်​သက်​ရှိ​မည့်​အ​ကြောင်း စောင့်​ရှောက်​တော်​မူ​လိမ့်​မည်။” ဟေရှာယ‬ ‭26‬:‭3‬

မိတ်ဆွေ ရေ... ဒီနေ့မှာ သင်လုပ်ဆောင်နိုင်တဲ့ အရာကတော့ ယေရှုခရစ်တော်နဲ့ အတူ ဘာကိုမှမတွေးပဲ အနားယူလိုက်ပါ ။ မိနစ်အနည်းငယ်လောက် နေ့စဉ် အချိန်ပေးပြီး ယေရှုထံ ချဉ်းကပ်ပါ၊ သခင့်ကို သင့်နှလုံးသားရဲ့ ဒါဏ်ရာ အနာတရတွေအတွက် ကုသခွင့်ပေးလိုက်ပါ။ 

ဘုရားသခင်နှင့်အတူ အနားယူခြင်းက သင့်ကို ပြည့်စုံစေပါလိမ့်မယ် 🤍