ချီးမွမ်းခြင်းနဲ့ ခြေလှမ်းလိုက်ပါ ! 

ဒီတစ်ပါတ်တာမှာတော့ ကျွန်မတို့ အတူတကွ“နောက်ထပ်ခြေတစ်လှမ်း” ဆိုတဲ့ ခေါင်းစဉ်နဲ့ တစ်ပါတ်တာလုံး နှုတ်ကပါတ်တော်ကို လေ့လာနေကြတာ ဖြစ်ပါတယ် ။

မိတ်ဆွေ ရေ... ဘဝမှာ အရာအားလုံးအဆင်ပြေပြီး ကောင်းကင်ကြီးကိုကြည့်လိုက်တာနဲ့ ပြာလွင်တောက်ပနေတဲ့ နေ့ရက်တွေရှိသလို၊ တစ်ခါတလေ ဘာကြောင့်မှန်းမသိဘဲ အရာရာ မဲမှောင်အုံ့မှိုင်းနေတဲ့ အခြေအနေမျိုးတွေကိုလည်း ကျွန်မတို့ ကြုံရတတ်ကြပါတယ် ။ အခု ဒီအချိန်မှာတောင် ဘယ်လိုခံစားနေရပါသလဲ ?

ကျွန်မ ဘဝရဲ့ ဖြတ်သန်းမှုတွေထဲကနေ သင်ယူခဲ့ရတဲ့ လျှို့ဝှက်ချက်တစ်ခုရှိပါတယ်။ အဲဒါကတော့ အခြေအနေတွေ ရှုပ်ထွေးပြီး စိတ်ပျက်အားလျော့နေရတဲ့ အချိန် ၊ ကန္တာရကို ဖြတ်သန်းသွားရသလို အခြေအနေ မျိုးမှာ “ချီးမွမ်းခြင်း” ဟာ နှလုံးသားကို ချက်ချင်းပြန်ပြီး ခွန်အားပြည့်လန်းဆန်းစေတဲ့ အံ့သြဖွယ်အကောင်းဆုံး သော့ချက်ဆိုတာပါပဲ။ 

ဒီနေ့လှမ်းရမယ့်ခြေလှမ်းကတော့ “ချီးမွမ်းခြင်းခြေလှမ်း” ပဲ ဖြစ်ပါတယ် ။

ဆာလံကျမ်း ၁၁၃:၃ မှာ -“နေ​ထွက်​ရာ​မှ​သည် နေ​ဝင်​ရာ​တိုင်​အောင်၊ ထာ​ဝ​ရ​ဘု​ရား၏​နာ​မ​တော်​သည် ချီး​မွမ်း​ဖွယ်​ဖြစ်၏။”

‭‭ဆာလံ‬ ‭113‬:‭3‬ ‭လို့ ဆင်ခြင်ရပါတယ်။

မနက်မိုးလင်း နေထွက်ချိန်ကနေ ညဘက် နေဝင်ချိန်အထိ၊ အသက်တာရဲ့ ဝမ်းမြောက်စရာ အချိန်တွေမှာတင်မကဘဲ နာကျင်ရတဲ့ အချိန်တွေမှာပါ ထာဝရဘုရားသခင်က အစဉ်အမြဲ ကိုးကွယ်ချီးမွမ်းခြင်းကို ခံထိုက်တဲ့အရှင် ဖြစ်ပါတယ်။

မိတ်ဆွေ ရေ... အရာအားလုံး ခက်ခဲပြီး ခမ်းခြောက် နေချိန်မှာတောင် ချီးမွမ်းဖို့ ထိုက်တန်တဲ့ အကြောင်းအရင်းများကို ဆင်ခြင်ရင်း ဘုရားသခင်ကို ကျေးဇူးတင်စကား ပြောလိုက်ပါ။ ဟေဗြဲ ၁၃:၁၅ မှာလည်း ဘုရားသခင်ရဲ့ ကျေးဇူးတော်ကို ဝန်ခံလျက် နှုတ်ခမ်းအသီးတည်းဟူသော ချီးမွမ်းခြင်းယဇ်ကို အစဉ်မပြတ် ပူဇော်ဖို့ အားပေးထားသလို၊ ဆာလံ ၉:၂ မှာလည်း ကိုယ်တော်ကို အမှီပြုလျက် ဝမ်းမြောက်ရွှင်လန်းပြီး နာမတော်ကို ထောမနာသီချင်းဆိုဖို့ သွန်သင်ထားပါတယ်။ ဒါဟာ ဘုရားသခင်ရှေ့မှာ အမြဲရှင်သန် လန်းဆန်းနေတဲ့ နှလုံးသားရဲ့ လျှို့ဝှက်ချက်ပဲ ဖြစ်ပါတယ် ။

ဒီနေ့မှာတော့ အခြေအနေတွေကို လွှတ်ချလိုက်ပြီး ကျွန်မနဲ့အတူ ဘုရားသခင်ကို ချီးမွမ်းကိုးကွယ်ကြရအောင် ။ ကိုယ်တော် ပြုပေးခဲ့သမျှနဲ့ အနာဂတ်မှာ ပြုဦးမယ့် အရာအားလုံးအတွက် “ကျေးဇူးတင်ပါတယ်” လို့ နှုတ်ကနေ ထုတ်ပြောကြရအောင် …

“ယေရှုဘုရားသခင် ၊ ကျွန်ုပ်ရဲ့ အသက်တာထဲမှာ ကောင်းမြတ်ခဲ့သမျှ အရာအားလုံးအတွက် ကျေးဇူးတင်ပါတယ်။ အခြေအနေ ကောင်းသည်ဖြစ်စေ၊ ဆိုးသည်ဖြစ်စေ ကျွန်ုပ်ရဲ့ နှုတ်ခမ်းအသီးတည်းဟူသော ချီးမွမ်းခြင်းယဇ်ကို ရှေ့တော်မှာ အစဉ်မပြတ် ပူဇော်ပါမည်။ ကိုယ်တော်၌သာ ဝမ်းမြောက်ရွှင်လန်းပြီး နာမတော်ကို ယုံကြည်စိတ်ချစွာ ကိုင်စွဲလျက် နောက်ထပ်ခြေတစ်လှမ်းကို ဆက်လှမ်းပါမည်။ ယေရှုနာမ၌ ဆုတောင်းပါ၏။ အာမင်။”

နောက်ထပ်ခြေတစ်လှမ်းကို ချီးမွမ်းခြင်းနဲ့ လှမ်းလိုက်ပါ 🤍