ယုံကြည်ခြင်းကို ခိုင်ခံ့စေပါ !
မိတ်ဆွေ ရေ...
ဒီတစ်ပါတ်တာမှာ “စိတ်ပျက်အားလျော့ခြင်းအားအောင်မြင်ခြင်း” ဆိုတဲ့ ခေါင်းစဉ်နဲ့ နှုတ်ကပါတ်တော်များကို လေ့လာရင်း ဆက်လက် တည်ဆောက်သွားကြမှာ ဖြစ်ပါတယ် ။
ကျမတို့ လူသားတွေမှာ ခန္ဓာကိုယ် ကျန်းမာဖို့ လေ့ကျင့်ခန်းလုပ်ရသလိုပဲ စိတ်ပျက်အားလျော့တဲ့အချိန်မှာ ယုံကြည်ခြင်း ခိုင်ခံ့ဖို့လည်း လေ့ကျင့်ခန်း လုပ်ရပါမယ်။ တခါတလေမှာ ဘာမှမလုပ်ချင်လောက်အောင် အင်အားကုန်ခမ်းပြီး ယုံကြည်ခြင်းဆိုတာ ကို အစအန ရှာမတွေ့လောက်အောင် မှေးမှိန်သွားတတ်ပါတယ် …
ဒီလို အခြေအနေမျိုးမှာ ပြန်လည်ပြီး ယုံကြည်ခြင်း အားကြီး လာစေဖို့ လေ့ကျင့်ရပါမယ် မိတ်ဆွေ!
ဒါဝိဒ်ဟာ ဝက်ဝံတွေ၊ ခြင်္သေ့တွေကို တိုက်ခိုက်ရင်း လေ့ကျင့်ခဲ့လို့ ဂေါလျတ်ရှေ့ကို ရောက်တဲ့အခါလည်း အောင်မြင်ခဲ့တာ ဖြစ်ပါတယ်။ လေ့ကျင့်မှုမရှိရင် အောင်မြင်မှုဆိုတာ လည်း မရှိနိုင်ပါဘူး ။
ကျွန်မတို့က ယုံကြည်ခြင်းကို လေ့ကျင့်ရတဲ့ အခါ အရာခပ်သိမ်း အဆင်ပြေချောမွေ့နေတဲ့ အချိန်မှာ မဟုတ်ပဲ လမ်းစပျောက်တဲ့ အချိန် ၊ ကူရာမဲ့သလို ခံစားရတဲ့အချိန်မှာပဲ လေ့ကျင့်ရတာ ဖြစ်ပါတယ် ။ ယုံကြည်ခြင်းဆိုတာ မမြင်သေးတဲ့ အရာကို သိမှတ်စွဲလမ်းခြင်းပဲ မဟုတ်ပါလား ! ဟေဗြဲ ၁၁:၁
ဒါကြောင့် စိတ်ပျက်အားလျော့နေတဲ့ အချိန်က ယုံကြည်ခြင်း အားကြီးလာဖို့အတွက် လေ့ကျင့်ခံနေရတဲ့ အခြေအနေ မျိုးပါပဲ မိတ်ဆွေ ရေ...
ယုံကြည်ခြင်းမှာ အားကြီးလာဖို့အတွက် ဒီလိုစတင်လေ့ကျင့်လိုက်ပါ ။
နှုတ်ကပါတ်တော်ကို များများ ဝန်ခံပါ …
ဆုတောင်းခြင်း အားကြီးလိုက်ပါ …
မျက်ရည်ကျလျက်ပင် ချီးမွမ်းလိုက်ပါ …
သင်မသိသေးတဲ့ နောက်ကွယ်က ဘုရားရဲ့ လက်တော်က မကြာခင်မှာ ထင်ရှား လာတာကို ပြန်လည် ခံစားရမှာ ဖြစ်ပါတယ်
မိတ်ဆွေ ရေ…
ကောင်းခြင်း ၊ ဆိုးခြင်း အပေါ် အခြေခံပြီး သင့်ယုံကြည်ခြင်းကို မတည်ဆောက်လိုက်ပါနဲ့နော် ! ဘုရားသခင်ကတော့ သင့်အတွက် မကောင်းသော အကြံကို မကြံပါဘူး ။
သင်မခံစားရတိုင်း ဘုရားက အတူမရှိနေတာ မဟုတ်ပါဘူး … ခံစားချက်တွေနဲ့လည်း ယုံကြည်ခြင်းကို မတည်ဆောက်လိုက်ပါနဲ့ ! ဒါလေးကို အတူတကွ ဝန်ခံကြရအောင် !
“ကျွန်ုပ်သည် ဘုရားသခင်၏ သားသမီးဖြစ်သည် ! နှုတ်ကပတ်တော်သည် ကျွန်ုပ်၌တည်သဖြင့် ဒီအခြေအနေကို အောင်မြင်ပြီ ! ကျွန်ုပ်သည်အခြေအနေပေါ် မမူတည်ပဲ ဘုရားသခင်ကို ယုံကြည်နိုင်သောသူ ဖြစ်သည်” !
မိတ်ဆွေ ရေ...
“လူပျိုတို့၊ သင်တို့သည် ခွန်အားနှင့်ပြည့်စုံကြသည်ဖြစ်၍၊ ဘုရားသခင်၏နှုတ်ကပတ်တော်သည် သင်တို့၌ တည်သဖြင့်၊ သင်တို့သည် ထိုဆိုးညစ်သောသူကို အောင်ကြပြီ။”
