အရာအားလုံး အချိန်တန်ရင် ပြန်လည်လှပလာလိမ့်မယ် …
မိတ်ဆွေ ရေ…
ဒီတစ်ပါတ်တာမှာ “စိတ်ပျက်အားလျော့ခြင်းအားအောင်မြင်ခြင်း” ဆိုတဲ့ ခေါင်းစဉ်နဲ့ နှုတ်ကပါတ်တော်များကို ဆက်ပြီး လေ့လာရင်း တည်ဆောက်သွားကြမှာ ဖြစ်ပါတယ် ။
ကျမတို့ လူသားတွေရဲ့ ဘဝမှာ စိတ်ဖိစီးရတာဟာ စိတ်မရှည်နိုင်လို့ ဖြစ်တတ်ပါတယ်။
ဥပမာ - အခုပဲ Gym ဆော့ပြီး အခုပဲ ကြွက်သား ကြီးမားချင်လို့မရပါဘူး ။ သင်ကြွက်သားမထွက်သေးတာဟာ သင့်ကြွက်သားတွေ အားနည်းနေလို့ မဟုတ်ပါဘူး ။ လုံလောက်တဲ့ အချိန်မရသေးလို့ပဲ ဖြစ်ပါတယ် ။
အဲ့လိုပဲ ကျွန်မတို့ကလည်း အခုပဲ ဆုတောင်း ၊ အခုပဲ ရချင်တယ် ။ ဖြစ်မလာသေးတဲ့အခါ စိတ်ဓာတ်ကျရတာဟာ ဘုရားသခင် မတတ်နိုင်လို့လား ? မဟုတ်ပါဘူး ။ ကျွန်မတို့ စိတ်လောနေတတ်ကြလို့ပဲ ဖြစ်ပါတယ် ။ အရာအားလုံးကို ကျွန်မတို့က ထိန်းချုပ်ချင်တတ်ကြတယ် ။
“ငါဖြစ်ချင်တဲ့ အချိန်မှာ ဖြစ်ကို ဖြစ်လာရမယ်
ဒီအချိန်မှာ ဒီလောက်တော့ ဖြစ်သင့်နေပြီ “ စသဖြင့် သတ်မှတ်ချက်တွေကြားမှာပဲ ပိတ်လှောင်ကြပီး မဖြစ်လာသေးတဲ့အခါ ကိုယ့်ကိုယ်ကိုပဲ ပြန်ပြီး ထိုးနှက်တတ်ကြပါတယ် ။
စိတ်ရှည်ပါ မိတ်ဆွေ ရေ…
ဘုရားရဲ့ အချိန်ထဲမှာ ဘယ်အရာကမှ နောက်မကျပါဘူး …
ဘုရားသခင်ရဲ့ အဖြေဟာ တစ်ခါတရံမှာ လူ့အတွေးအခေါ်နဲ့ စဉ်းစားပြီး နောက်ကျတော့မှာလားလို့ ထင်ရပေမယ့် ဘယ်တော့မှ အချိန်မနှောင်းပါဘူး ။
အခုချက်ချင်း အခြေအနေတွေ မပြောင်းလဲသေးရင်တောင် ဘုရားသခင်ကိုဆက်ပြီး ယုံပါ ။ လူသားတစ်ယောက်အနေနဲ့ အရာအားလုံးကို မထိန်းချုပ်နိုင်ပါဘူး …
ဒီနေ့မှာ သင့်အနေနဲ့ စိတ်ပျက်အားလျော့ခြင်းအလယ်မှာ စောင့်ဆိုင်းနေရရင်တောင် ဘုရားသခင်ကိုပဲ ဆက်ပြီး ယုံကြည်ပါ မိတ်ဆွေ ရေ…
သင့်အတွက် ကောင်းကြီးမင်္ဂလာတွေဟာ လမ်းမှာ ရောက်နေပါပြီ။ ကိုယ်တော့်အနားမှာပဲ ဖက်တွယ်နေလိုက်ပါ ။ ကိုယ်တော်ဟာ သင့်အနားမှာ အမြဲရှိနေပြီး ခပ်သိမ်းသောအရာတို့ကို အချိန်တန်တဲ့အခါ လှပစွာ ဖန်ဆင်းပေးမည့်ဘုရား ဖြစ်ပါတယ်။
“ကိုယ်တော်သည် ခပ်သိမ်းသောအရာတို့ကို မိမိတို့အချိန်တန်လျှင် လှပစွာ ဖန်ဆင်းတော်မူပြီ။”
မိတ်ဆွေ ရေ...
ဒီနေ့မှာ အခြေအနေတွေကို နားမလည်နိုင်သည့်တိုင်အောင် စိတ်ပျက်အားလျော့မသွားဘဲ ရှေ့ကို ရဲဝံ့စွာ လျှောက်လှမ်းဖို့ ဆုံးဖြတ်ချက် ချလိုက်ပါ ။
ပြန်လည်လှပစေသော ဘုရားလက်တော်ထဲသို့ အရာခပ်သိမ်းကို ပေးလိုက်ပါ 🤍
