ခွင့်လွှတ်ခြင်းဆိုတာ ဒါမျိုးမဟုတ်ပါဘူး...

ဒီနေ့မှာ  “ကျန်းမာတဲ့နှလုံးသား” ခေါင်းစဉ်အတိုင်း နှုတ်ကပါတ်တော်ကိုဆက်ပြီး လေ့လာသွားကြရအောင် …

ကျွန်မတို့နှလုံးသားကို မကျန်းမာစေတဲ့ အကြောင်းအရာများစွာထဲက တစ်ခုကတော့ “ခွင့်မလွှတ်နိုင်ခြင်း” ပဲ ဖြစ်ပါတယ် ။ 

ကျွန်မတို့ နာကျင်နေရတဲ့အခါ၊ ခွင့်လွှတ်ဖို့ ခက်ခဲနေတဲ့အခါမှာ ခွင့်လွှတ်လိုက်ရင် ဖြစ်လာမယ့် နောက်ဆက်တွဲတွေကို ကြောက်တဲ့ စိတ် ရှိတတ်ပါတယ် ။ ဥပမာ -

“ငါသာ ခွင့်လွှတ်လိုက်ရင် သူ့နဲ့ အရင်လို သူငယ်ချင်း ပြန်လုပ်ရတော့မှာလား” 

“ငါသာ ခွင့်လွှတ်လိုက်ရင် ငါ့အပေါ် အရင်လို ပြန်ပြီး အနိုင်ကျင့်တော့မှာမဟုတ်လား ” ဆိုပြီးတော့ပေါ့ ။

ဒါပေမယ့်... အဲ့လိုတွေးရမှာ မဟုတ်ပါဘူး! 

ခွင့်လွှတ်ခြင်း ဆိုတာ နက်နဲပါတယ် …

ခွင့်လွှတ်ခြင်းက သင်နဲ့ ဘုရားသခင်ကြားမှာရှိနေတဲ့ ဆက်နွယ်မှုတစ်ခုပါ ။ 

ဟုတ်ပါတယ် ! ခွင့်လွှတ်ခြင်းဆိုတာ ဘုရားသခင်ရဲ့ စကားကို နားထောင်ခြင်းဖြစ်ပါတယ်။

“တစ်​ယောက်၌​တစ်​ယောက် အ​ပြစ်​တင်​စ​ရာ​အ​ခွင့် ရှိ​လျှင်၊ အ​ချင်း​ချင်း​သည်း​ခံ၍ အ​ပြစ်​ကို လွှတ်​ကြ​လော့။ ခ​ရစ်​တော်​သည် သင်​တို့၏​အ​ပြစ်​ကို လွှတ်​တော်​မူ​သ​ကဲ့​သို့၊ ထို​နည်း​တူ​ပြု​ကြ​လော့။-” ‭‭ကောလောသဲ‬ ‭3‬:‭13‬ ‭JBMLE‬‬

ဘုရားသခင်က သင့်ကို ခွင့်လွှတ်ခိုင်းတာဟာ ဘုရားသခင်ရဲ့ နှလုံးသားကို ဝန်ခံပြီး သူ့ရဲ့ အလိုတော်နဲ့ ထပ်တူကျဖို့ပဲ ဖြစ်ပါတယ်။ သင့်ကို နာကျင်စေခဲ့တဲ့သူနဲ့ အရင်လို သူငယ်ချင်း အတိုင်း ပြန်ပေါင်းဖော်ဖို့က မဖြစ်မနေတော့ မဟုတ်ပါဘူး။

အကယ်၍ ပြန်လည်သင့်မြတ်ပြီး ကျန်းမာတဲ့ ဆက်ဆံရေးတစ်ခု ပြန်စနိုင်ရင်တော့ အကောင်းဆုံးပေါ့။ ဒါပေမယ့် အခြေအနေအရ အဲဒီလို ဖြစ်မလာခဲ့ရင်လည်း ဘုရားသခင် သင့်ဆီက တောင်းဆိုတဲ့အရာတစ်ခုက ... "ခွင့်လွှတ်ဖို့" ပါပဲ။

ကျွန်မတို့က တစ်စုံတစ်ယောက်အပေါ် ခါးသီးမှုကို ဆုပ်ကိုင်ထားတဲ့အခါ ကျွန်မတို့ရဲ့ နှလုံးသားမှာ သန့်ရှင်းသောဝိညာဉ်တော်ရဲ့ လှုပ်ရှားခြင်းကို “အဟန့်အတား” ဖြစ်စေပါတယ်။ ကျွန်မတို့အသက်တာထဲမှာ ဘုရားရဲ့ တန်ခိုးနဲ့ ကောင်းမြတ်ခြင်းတွေ ထင်ရှားဖို့ ခွင့်လွှတ်လိုက်ခြင်းကသာ ကျွန်မတို့ရဲ့ နှလုံးသားနဲ့ ကောင်းကင်ဘုံရှင်အဖဘုရားရဲ့ နှလုံးသားကို ထပ်တူဖြစ်အောင် ပြန်လည်ချိတ်ဆက်ပေးနိုင်တာပါ။

မိတ်ဆွေ ရေ... ခက်ခဲတဲ့အချိန်တွေကို ဖြတ်သန်းနေရတဲ့အခါ ခွင့်လွှတ်ခြင်းကိုပဲ ရွေးချယ်ဖို့ အားပေးချင်ပါတယ်။ ခွင့်လွှတ်ခြင်းလမ်းက မလွယ်ကူပေမယ့် သင်ရွေးချယ်လိုက်တဲ့အခါ အဲဒါဟာ သင်ကိုယ်တိုင်အတွက် သင့်ကိုယ်သင်ပြန်ပေးလိုက်တဲ့ လက်ဆောင်တစ်ခု ဖြစ်သွားပါလိမ့်မယ်။

သင့်ရဲ့ခွင့်လွှတ်ခြင်းကပဲ သင့်ကို လွတ်မြောက်စေလိမ့်မယ် 🤍