အချိန်ယူလိုက်ပါ!
တခုလောက်မေးချင်ပါတယ် .. သင့်ရဲ့ အချိန်တော်တော်များများကို ဘယ်နေရာမှာ အသုံးပြုမိနေပါသလဲ ?
ကျွန်မတို့ရဲ့ တနေ့တာ ဟာ တခါတလေ မိသားစုအတွက် ၊ အလုပ်အတွက် ၊ ဘေးမှာရှိတဲ့ သူတွေအတွက် အသက်ရှင်မိတဲ့အခါ ကိုယ့်ကိုယ်ကို အချိန်ပြန်ပေးဖို့တောင် မရှိပဲ ဖြစ်သွားတတ်ပါတယ် ။ ကျွန်မတို့ဟာ အလုပ်လုပ်ဖို့လိုအပ်သလို အနားယူဖို့လည်း လိုအပ်နေပြန်ပါတယ် ။ အနားယူခြင်း ထဲမှာပဲ ဘုရားသခင်ရဲ့ အလိုတော်ကို ရှာဖွေပြီး ကိုယ့်ကိုယ်ကို ပြန်လည် တွေ့ရှိနိုင်ပါတယ် ။
အချိန်ယူပြီး ကျမ်းစာဖတ်တယ် ၊ အချိန်ယူပြီး ဆုတောင်းတယ် ၊ အချိန်ယူပြီး ဘုရားသခင်နဲ့ အတူ ဘာမှ မတွေးပဲနဲ့ အနားယူတတ်ခြင်းဟာ ကျွန်မတို့ကို အသစ်သော ခွန်အားပြန်လည်ရရှိစေပြီး ၊ လန်းဆန်းစေပါတယ် ။
တနေ့တာ မစတင်ခင်မှာ ဘုရားသခင်ရဲ့ နှုတ်ကပါတ်တော် ကို ဖတ်ပြီး ဆင်ခြင်ခြင်းဟာလည်း အတွေးအမြင်တွေကို ဘုရားအလိုတော်အတိုင်းဖြစ်စေပြီး ၊ ဘုရားရဲ့ ထူးခြားတဲ့ ဥာဏ်ပညာကို ရရှိနိုင်ပါတယ် ။
“ထိုပညတ္တိကျမ်းစာ၌ ရေးထားသမျှအတိုင်းကျင့်မည်ဟု စောင့်ရှောက်ခြင်းအလိုငှာ ကျမ်းစာကို မဖတ်မရွတ်ဘဲမနေ၊ နေ့ညမပြတ် ကြည့်ရှုဖတ်ရွတ်ရမည်။ သို့ပြုလျှင် သင်သည်အကြံထမြောက်၍ အောင်မြင်လိမ့်မည်။” ယောရှု ၁:၈
ဒါကြောင့် မိတ်ဆွေ ရေ ..
အရာခပ်သိမ်းက ဘုရားသခင်နဲ့ အချိန်ယူခြင်းကပဲ စတင်တယ်လို့ ပြောချင်ပါတယ် …
ဒီနေ့ကစပြီး တစ်ရက်ကို ၁၀ မိနစ် - ၁၅ မိနစ်လောက် ဘာမှမပြောပဲနဲ့ ဘုရားရဲ့ စကားကို တိတ်ဆိတ်စွာ နားထောင်ကြည့်ရအောင် !
စိတ်ဖိစီးမှု ၊ ပင်ပန်းမှုတွေကို မစဉ်းစားပဲ ခဏလောက် အချိန်ယူလိုက်ပါဦး …
လမ်းလျှောက်နေရင်း ဖြစ်ဖြစ် ၊ အိပ်ယာပေါ်မှာ ဖြစ်ဖြစ် ၊ အိမ်မှုကိစ္စလုပ်နေရင်းပဲ ဖြစ်ဖြစ် ဘယ်နေရာမှာ ရှိနေပါစေ သင့်နှလုံးသားက ဘုရားရဲ့ အသံကို ခဏလောက်နားစွင့်ကြည့်လိုက်ပါ …
ဘုရားသခင်ဟာ သင့်ကို အခြေအနေတိုင်းမှာ စကားပြောဖို့ အသင့်ရှိနေပါတယ် ။
ဘုရားစကားနားထောင်ဖို့ အခုအချိန်က သင့်အတွက် အကောင်းဆုံးပဲ မိတ်ဆွေ !
သင့်ရဲ့ အချိန်တွေ ဘုရားကိုပေးလိုက်ခြင်းက အချည်းနှီး မဖြစ်ပါဘူး 🤍
