သင့်အတွင်းစိတ်ရဲ့ စကားသံကို အာရုံစိုက်ပါ

ဒီနေ့မှာတော့ ကျွန်တော်တို့ရဲ့စိုးရိမ်ပူပန်မှုတွေကို သခင်ယေရှုရဲ့ခြေတော်ရင်းမှာ ချထားပြီး ဝမ်းမြောက်ခြင်းကို ပြန်လည်ရှာတွေ့နိုင်ဖို့အတွက် ဆာလံ ၉၄:၁၈-၁၉ ကို အခြေခံတဲ့ ခရီးစဉ်သစ်တစ်ခုကို စတင်ချင်ပါတယ်။

'ငါ့​ခြေ​ချော်​လျက်​ရှိ​သည်​ဟု အ​ကျွန်ုပ်​ဆို​သော​အ​ခါ၊ အို​ထာ​ဝ​ရ​ဘု​ရား၊ ကိုယ်​တော်၏​က​ရု​ဏာ​သည် အ​ကျွန်ုပ်​ကို ထောက်​မ​ပါ၏။ အ​ကျွန်ုပ်၏​နှ​လုံး​ထဲ​မှာ စိတ်​များ​ပြား​သော​အ​ခါ၊ ကိုယ်​တော်​သည် သက်​သာ​စေ​တော်​မူ​သ​ဖြင့်၊ အ​ကျွန်ုပ်၏ ဝိ​ညာဉ်​သည် ရွှင်​လန်း​ပါ၏။ ' (ဆာလံ ၉၄:၁၈-၁၉)

“‘ငါ့​ခြေ​ချော်​လျက်ရှိသည်’ဟု​ အ​ကျွန်ုပ်​ဆို​သော​အ​ခါ”... ကျွန်တော်တို့ အားလုံးဟာ အချိန်တိုင်း ကိုယ့်ကိုယ်ကိုယ်ပြန်ပြီး စကားပြောလေ့ရှိကြပါတယ်။ မိတ်ဆွေ၊ သင်ကော ဘယ်လိုလဲ။ သင့်အတွင်းစိတ်ရဲ့ ဆိတ်ငြိမ်ရာနေရာလေးမှာ သင်ဟာ ကိုယ့်ကိုယ်ကိုယ် ဘယ်လိုစကားတွေ ထပ်ခါတလဲလဲ ပြောလေ့ရှိပါသလဲ။ ဘယ်လိုစကားလုံးတွေနဲ့ သင့်ကိုယ်သင် ကျွေးမွေးနေပါသလဲ။

ကျွန်တော်တို့ထဲက တချို့က ကိုယ့်ကိုယ်ကိုယ် ဒီလိုထင်မြင်နေတတ်ကြပါတယ်…

• ငါက အရည်အချင်းမရှိဘူး၊

• ငါက လူတွေနဲ့ ရင်းရင်းနှီးနှီး မနေတတ်ဘူး၊

• ငါက စိတ်မရှည်တတ်ဘူး၊

• ငါက ဉာဏ်မကောင်းဘူး၊

• ငါက ရုပ်မချော၊ မလှဘူး၊

• ငါက ချစ်ခြင်းမေတ္တာနဲ့ မထိုက်တန်ဘူး… စသဖြင့်ပေါ့။

ဒီလိုအတွေးမျိုးတွေကို သင်ဟာ ကိုယ့်ကိုယ်ကိုယ် နှစ်ပေါင်းများစွာ ထပ်ခါတလဲလဲ ပြောဆိုနေခဲ့တာဖြစ်နိုင်ပါတယ်။ ဒါပေမဲ့ ဘုရားသခင်ကလည်း သင့်ကို စကားပြောနေပါတယ်၊ ဒီနေ့မှာတော့ ဘုရားသခင်ရဲ့အသံက သင့်အတွင်းစိတ်ထဲမှာ ပိုပြီးကျယ်လောင်စွာ ထွက်ပေါ်လာနေပါတယ်- “သင်ဟာ ငါ့ရဲ့တစ်ပါးတည်းသောသား၊ ငါ့အသက်နဲ့ ရွေးဝယ်ရလောက်အောင် ထိုက်တန်သောသူ ဖြစ်တယ်။ သင်ဟာ ငါ့ရဲ့ လက်မလျှော့တဲ့ မေတ္တာနဲ့ ထိုက်တန်သူဖြစ်တယ်။”

ကျွန်တော်တို့ရဲ့ အတွင်းစိတ်စကားသံနဲ့ ယုံကြည်ခြင်းကြားက ဆက်စပ်မှုဟာ အလွန်ရှင်းလင်းပါတယ်။ မျှော်လင့်ချက်ပျောက်ဆုံးနေချိန်မှာ ရိုးသားစွာနဲ့ နှလုံးသားကနေ ဆုတောင်းခဲ့တဲ့ ပရောဖက်ယေရမိကို ကြည့်ကြည့်ပါ- 'သို့​ဖြစ်၍၊ ငါ​သည် ထာ​ဝ​ရ​ဘု​ရား​ရှေ့​တော်၌ အ​စွမ်း​သ​တ္တိ​နှင့် မျှော်​လင့်​စ​ရာ​အ​ကြောင်း ပျက်​လေ​ပြီ​ဟု ဆို​ရ၏။ အ​ကျွန်ုပ်​ခံ​ရ​သော ဆင်း​ရဲ​ငြို​ငြင်​ခြင်း​ကို​လည်း​ကောင်း၊ ဒေါ​န​နှင့် သည်း​ခြေ​အ​ရည်​ကို​လည်း​ကောင်း အောက်​မေ့​တော်​မူ​ပါ။ ဧ​ကန်​အ​မှန် အောက်​မေ့​တော်​မူ​လိမ့်​မည်။'  (ယေရမိမြည်တမ်းစကား ၃:၁၈-၂၀)

ဒါပေမဲ့ ဘုရားသခင်က ကျွန်ုပ်တို့ ကိုယ့်ကိုယ်ကိုယ်ပြောနေတဲ့စကားတွေကို ပြောင်းလဲဖို့ အချိန်ယူရတယ်ဆိုတာ သိပါတယ်။ ပရောဖက်ယေရမိက အဲ့ဒီဆုတောင်းချက်ထဲမှာပဲ ဒီလိုဆက်ပြီးပြောခဲ့ပါတယ်- 'ထို​သို့ အ​ကျွန်ုပ်၏​စိတ်​နှ​လုံး​သည် ဆင်​ခြင်၍​သ​တိ​ရ​သော​အ​ခါ မျှော်​လင့်​စ​ရာ​အ​ခွင့်​ရှိ​ပါ၏။ ထာ​ဝ​ရ​ဘု​ရား​သည်​သ​နား​တော်​မူ၍ က​ရု​ဏာ​တော်​သည် မ​ကုန်​သော​ကြောင့် ငါ​တို့​သည် ဆုံး​ရှုံး​ခြင်း​သို့ မ​ရောက်​ဘဲ​နေ​ကြ၏။ နံ​နက်​တိုင်း က​ရု​ဏာ​တော်​အ​သစ်​ကို ခံ​ရ​ကြ၏။ သ​စ္စာ​တော်​သည် ကြီး​မြတ်​ပါ၏။ ငါ့​ဝိ​ညာဉ်၏​သ​ဘော​ဟူ​မူ​ကား၊ ထာ​ဝ​ရ​ဘု​ရား​သည် ငါ၏​အ​ဖို့​ဖြစ်​တော်​မူ၏။ ထို​ကြောင့်၊ ကိုယ်​တော်​ကို ငါ​မျှော်​လင့်​ပါ၏။'(ယေရမိမြည်တမ်းစကား ၃:၂၁-၂၄)

Lauren Daigle ရဲ့ "You Say" ဆိုတဲ့ ဒီတန်ခိုးပါတဲ့ ဓမ္မသီချင်းလေးက ဘုရားသခင်က သင့်အကြောင်း ဘယ်လိုပြောထားသလဲဆိုတာကို သင်ဘယ်လိုစတင်ပြီး အမှန်တကယ်ယုံကြည်လာနိုင်မလဲဆိုတာကို ဖော်ပြပေးပါတယ်။ ဒီသီချင်းလေးက ကိုယ်တိုင်တန်ဖိုးမရှိဘူးလို့ ခံစားရတဲ့ အတွင်းစိတ်ရုန်းကန်မှုတွေကို ယုံကြည်ခြင်းအားဖြင့် ဘယ်လိုခွန်အားယူပြီး ကိုယ့်ရဲ့တန်ဖိုးကို ဘုရားသခင်ထဲမှာ ရှာတွေ့နိုင်ကြောင်း ပြောပြထားပါတယ်။ 

သင့်ရဲ့စိုးရိမ်ပူပန်မှုတွေကို စွန့်လွှတ်ပြီး ဝမ်းမြောက်ခြင်းကို ပြန်လည်ရှာတွေ့ဖို့အတွက်၊ သင်ကိုယ့်ကိုယ်ကိုယ် ဘာတွေပြောနေလဲဆိုတာကို နားထောင်ခြင်းဖြင့် အရင်ဆုံးစတင်ပါ။ ပြီးရင် အဲ့ဒီအတွေးအခေါ်တွေကို ဒီနေ့ပြောင်းလဲလိုက်ပါ။ ဘုရားသခင်ဟာ စိတ်ရှည်တော်မူပါတယ်၊ သင်သာခွင့်ပြုမယ်ဆိုရင် ဘုရားသခင်က သင့်ကိုကူညီပါလိမ့်မယ်။ ကိုယ်တော်နဲ့အတူ၊ ဘုရားသခင် သင့်အကြောင်းပြောထားတဲ့ သမ္မာတရားကို သင်ရှာဖွေတွေ့ရှိပြီး ယုံကြည်လာပါလိမ့်မယ်။

သင်ဟာ ကောင်းကြီးမင်္ဂလာတစ်ခုဖြစ်ပါတယ်။