ဘုရားသခင်အကြောင်း သိခြင်းထက် ဘုရားသခင်နှင့် သိကျွမ်းခြင်း
ဒီတစ်ပါတ်တာမှာ “ဘုရားသခင်နှင့် ရင်းနီးကျွမ်းဝင်ခြင်း” ဆိုတဲ့ ခေါင်းစဉ်နဲ့ လေ့လာသွားကြမှာ ဖြစ်ပါတယ် ။
ခရစ်ယာန်အသက်တာမှာ “ဘုရားသခင်ကို သိတယ်” ဆိုတဲ့စကားကို ကျွန်မတို့ မကြာခဏပြောတတ်ကြပါတယ်။
ကျမ်းစာကို သိတယ်။ဘုရားသခင်ရဲ့ အကြောင်းအရာတွေကို သိတယ်။ကျမ်းပိုဒ်တွေကို မှတ်မိတယ်။တရားဒေသနာတွေ နားထောင်တယ်။ဘုရားသခင်ရဲ့ အမှုတော်မြတ် တွေကိုလည်း မြင်တွေ့ဖူးတယ်။
ဒါပေမယ့် ဘုရားသခင်အကြောင်းကို သိတာ နဲ့ ဘုရားသခင်ကို ကိုယ်တိုင်သိကျွမ်းတာနဲ့က မတူပါဘူး ။
စဉ်းစားကြည့်ပါ ။ လူတစ်ယောက်ရဲ့ အကြောင်းကို အချက်အလက်တွေ အများကြီး သိနိုင်ပါတယ်။
သူဘယ်မှာမွေးတယ်၊ဘာကိုကြိုက်တယ်၊ဘာလုပ်တယ်ဆိုတာ သိနိုင်ပါတယ်။
ဒါပေမယ့် အဲဒီအချက်အလက်တွေနဲ့တင် အဲဒီလူနဲ့ ရင်းနှီးတဲ့ဆက်ဆံရေးရှိတယ် လို့တော့ ပြောလို့မရပါဘူး။
ဘုရားသခင်နဲ့လည်း အလားတူပါပဲ။
ကျမ်းစာအကြောင်း သိလာတာက အရေးကြီးပါတယ်။Theology ကို လေ့လာတာကလည်း အရေးကြီးပါတယ်။
ဒါပေမယ့် အသိပညာက ဆက်ဆံရေးကို အစားထိုးလို့ မရပါဘူး။
“ထာဝရအသက်ဟူမူကား၊ မှန်သောဘုရားသခင် တစ်ဆူတည်းဖြစ်တော်မူသော ကိုယ်တော်ကိုလည်းကောင်း၊ စေလွှတ်တော်မူသော ယေရှုခရစ်ကိုလည်းကောင်း၊ သိကျွမ်းခြင်းတည်း။” ရှင်ယောဟန် 17:3
ဒီမှာ “သိကျွမ်းခြင်း” ဆိုတာ အချက်အလက်သိရုံကို ဆိုလိုတာမဟုတ်ပါဘူး။
ဘုရားသခင်ကို ကိုယ်တိုင်သိကျွမ်းခြင်း၊ကိုယ်တော်နဲ့အတူ အသက်ရှင်ခြင်း ကို ဆိုလိုပါတယ်။
ဘုရားသခင်က ကျွန်မတို့ကို သူနဲ့ သိကျွမ်းစေချင်တာပါ။
မိတ်ဆွေ ရေ…
ရှင်ပေါလုက ဘုရားသခင်အတွက် အမှုတော်တွေ အများကြီးလုပ်ခဲ့ပြီးနောက်မှာတောင်—
“ထိုမျှမက ငါ၏ သခင်ယေရှုခရစ်ကိုသိသော ပညာသည် အဘယ်မျှလောက် မြတ်သည်ကို ထောက်၍၊ ခပ်သိမ်းသောအရာတို့ကို ရှုံးစေသောအရာကဲ့သို့ ငါထင်မှတ်၏။-” ဖိလိပ္ပိ 3:8-10
လို့ ပြောပါတယ်။
သူ့အတွက် အမြင့်ဆုံးအောင်မြင်မှုက
အသိပညာတွေ ပိုတိုးလာတာ မဟုတ်ပဲ ခရစ်တော်ကို ပိုပြီးသိကျွမ်းလာခြင်းဖြစ်ပါတယ် ။
ဒါဟာ ကျွန်မတို့ရဲ့ အသက်တာမှာလည်း အရေးကြီးတဲ့အရာပါ။
ဘုရားသခင်ကို ကိုယ်တိုင် ပိုသိကျွမ်းလာကြပါစို့။
“အဖဘုရားရှင် …ကိုယ်တော်အကြောင်းကို သိရုံနဲ့ မကျေနပ်ဘဲ ကိုယ်တော်ကို ကိုယ်တိုင်သိကျွမ်းပြီး ရင်းနှီးတဲ့ဆက်ဆံရေးထဲမှာ အသက်ရှင်ချင်ပါတယ်။ အသိပညာထက် ကျွန်ုပ်ရဲ့ နှလုံးသားက ကိုယ်တော်နဲ့ ပိုနီးကပ်လာစေပါ။ ယေရှုခရစ်ကို ပိုသိကျွမ်းပြီး ကိုယ်တော်နဲ့အတူ လျှောက်လှမ်းတဲ့အသက်တာ ဖြစ်စေပါ။ ယေရှုနာမတော်၌ ဆုတောင်းပါ၏ ။ အာမင်။”
