သက်သာခြင်းကို လက်ခံရယူပါ
ဒီနေ့မှာတော့ ကျွန်ုပ်တို့ရဲ့ “၇ ရက်တာ အနားယူခြင်းအား ရှာဖွေခြင်း” ရဲ့ နောက်ဆုံးနေ့ရက်ကို ရောက်ရှိလာပါပြီ။ ဒီနေ့နဲ့ဆိုင်တဲ့ ကောင်းကြီးမင်္ဂလာကို လက်ခံရယူလိုက်ပါ။
သခင်ယေရှုက နှုတ်ကပတ်တော်ထဲမှာ ဒီလိုမိန့်ဆိုထားပါတယ် - 'ဝန်လေး၍ ပင်ပန်းသောသူအပေါင်းတို့၊ ငါ့ထံသို့ လာကြလော့။ ငါသည် ချမ်းသာပေးမည်။- ငါ့ထမ်းပိုးကို တင်၍ ထမ်းကြလော့။ ငါ့ထံ၌ နည်းခံကြလော့။ ငါသည် နူးညံ့သိမ်မွေ့နှိမ့်ချသော စိတ်သဘောရှိ၏။ သင်တို့စိတ်နှလုံးသည် သက်သာခြင်းကို ရလိမ့်မည်။' ရှင်မဿဲ ၁၁:၂၈-၂၉
ဒါဟာ ကတိတော်တစ်ခုဖြစ်ပါတယ်- သင်ဟာ သက်သာခြင်းကို တွေ့ရှိမှာဖြစ်ပါတယ်။ သင့်အပေါ်မှာ ဘယ်လိုဝန်ထုပ်တွေပဲ ဖိစီးနေပါစေ၊ သင့်အတွင်းထဲမှာ ဘယ်လိုတိုက်ပွဲတွေပဲ ဖြစ်နေပါစေ... ဘုရားသခင်ဟာ ကျွန်တော်တို့ရဲ့အားနည်းခြင်းတွေကို ထမ်းရွက်ဖို့အတွက် လူ့ဇာတိကို ခံယူခဲ့ပါတယ်။ ဘုရားသခင်ကိုယ်တိုင်က လူသားတစ်ဦးဖြစ်လာခဲ့တဲ့အတွက် သူ့အနေနဲ့ မဖြေရှင်းနိုင်တဲ့ လူ့ပြဿနာဆိုတာ မရှိပါဘူး။
သက်သာခြင်းမှာ အတိုင်းအတာ သုံးမျိုးရှိပါတယ်။ အဲ့ဒီသက်သာခြင်းကို ဒီနေရာတွေမှာ ရှာတွေ့နိုင်ပါတယ်-
သင့်အထဲမှာ ရှိနေတယ် - သင့်ရဲ့စိုးရိမ်ပူပန်မှုတွေဟာ သင့်အပေါ်မှာ၊ သင့်ရဲ့ဆုံးဖြတ်ချက်တွေအပေါ်မှာ၊ ဒါမှမဟုတ် သင့်ရဲ့စိတ်သဘောထားအပေါ်မှာ လွှမ်းမိုးနိုင်တဲ့တန်ခိုး မရှိတော့ပါဘူး။ ဘာကြောင့်လဲဆိုရင် ထိုသက်သာခြင်းဟာ သင့်အထဲမှာ ရှိနေပါတယ်။
သင့်နဲ့အတူ ရှိနေတယ် - သင်ဟာ စုံလင်သူတစ်ယောက်မဟုတ်သလို အရာအားလုံးကို တစ်ယောက်တည်းနဲ့ မထမ်းထားနိုင်ပါဘူး- ဘုရားသခင်ဟာ သင့်ကို အုပ်စိုးပြီး တစ်လှမ်းချင်းစီ ဦးဆောင်လမ်းပြပေးဖို့အတွက် အသင့်ရှိနေပါတယ်။ ဒါကြောင့် သက်သာခြင်းဟာ သူနဲ့အတူ ရှိနေပါတယ်။
သင့်အတွက် ရှိနေတယ် - ကောင်းကင်ကလာတဲ့ သက်သာခြင်းကို သင်သိရှိခံစားရပြီးတဲ့အခါမှာ၊ သင်ဟာ ဆိုးဝါးတဲ့ အခြေအနေတွေကိုတောင် ထိုသက်သာခြင်းအားဖြင့် ပိုပြီးသက်သောင့်သက်သာနဲ့ လျှောက်လှမ်းသွားလာနိုင်ပါလိမ့်မယ်။ ထိုသက်သာခြင်းဟာလည်း သင့်အတွက်အမြဲရှိနေပါတယ်။
မိတ်ဆွေ၊ ဒီတစ်ပတ်လုံး ဘုရားသခင်ရဲ့ငြိမ်သက်ခြင်းအကြောင်း အတူတကွလေ့လာခဲ့ရာကနေ သင် ဘယ်အရာတွေကို သင်ခန်းစာရရှိခဲ့ပါသလဲ။ ပြီးခဲ့တဲ့ ၇ ရက်တာကာလအတွင်းမှာ ဘုရားသခင် သင့်ကိုဖွင့်ပြခဲ့တဲ့အရာအားလုံးကို ချရေးပြီး၊ ဒီစာမျက်နှာကနေတစ်ဆင့် ကျွန်ုပ်ကို ပြန်လည်မျှဝေပေးဖို့ ဖိတ်ခေါ်ချင်ပါတယ်။ ဒါကို သတိရပါ... ဘုရားသခင်ဟာ အရာအားလုံးကို ထိန်းချုပ်သော အရှင်ဖြစ်ပါတယ်။
ဘုရားသခင် သင့်ကို သာ၍ ဖွင့်ပြပါစေ။
