ဟန်ချက်ညီဖို့ အရေးကြီးတယ် !

စက်ဘီးကို စပြီး သင်တဲ့အခါ အစပိုင်းမှာ စက်ဘီးကို ဟန်ချက်ညီညီမထိန်းတတ်သေးတော့ ဘယ် ၊ ညာ ယိုင်တတ်ပြီး ချော်လဲတတ်ကြတယ် ။

ဒါပေမယ့် သင်လေ့ကျင့်ပါများပြီး စက်ဘီးကို ဟန်ချက်ညီညီ စီးတတ်ပြီဆိုရင်တော့ လမ်းလျှောက်တာထက် ပိုပြီး မြန်မြန် အရှေ့ကိုရောက်စေတယ်မဟုတ်လား ? 

အဲ့လိုပဲ … ဘုရားသခင်နှင့်အတူအသက်ရှင် လျှောက်လှမ်းတဲ့အခါ ဟန်ချက်ညီညီ နဲ့ အသက်ရှင်နေထိုင်ဖို့လိုအပ်တယ် ။ 

ဘုရားသခင်က ကျွန်မတို့အပြစ်တွေအတွက် ကိုယ်စား ဆပ်ခဲ့ပေးပြီးပြီဆိုတဲ့ အရာဟာ အပြစ်တွေ ထပ်လုပ်ဖို့ ခွင့်ပြုပေးလိုက်တာတော့မဟုတ်ပါဘူး ။

ကျွန်မတို့ဟာ ဘုရားသခင်ရဲ့ ကျေးဇူးတော်ထဲမှာ ထာဝရကာလတိုင် နေထိုင်ခွင့်ရသည့်အလျောက် မိမိတို့ အသက်တာကို အပြစ်ထဲမှာ ဆက်လက်ကျင်လည်နေဖို့မဟုတ်ပဲ ဖြောင့်မတ်ခြင်းနဲ့ နေ့ရက်တိုင်းမှာ အသက်ရှင်ဖို့ လိုအပ်ပါတယ် ။ 

ပြီးခဲ့တဲ့ရက်တွေမှာလည်းလေ့လာခဲ့ကြတယ် ။ ဘုရားအတွက် သင်ဘာလုပ်ပေးလဲ ဆိုတာထက် သင်ဘယ်သူလဲဆိုတာ ပိုပြီးအရေးကြီးတဲ့ အကြောင်းကိုပေါ့ ။ 

ဒါပေမယ့် သင်ဘယ်သူဖြစ်သလဲဆိုတာ သင်ဘာလုပ်နေသလဲ ဆိုတဲ့အပေါ် မူတည်ပြီး ပေါ်လွင် ထင်ရှားနေတယ်ဆိုတာလည်း သတိရဖို့လိုတယ် ။ 

ဒီလိုမျိုးပေါ့ ! 

အားကစားသမားတစ်ယောက်လို့ ခေါ်ခြင်းဟာ အားကစားကို ကြိုးစားအားထုတ်ပြီး လုပ်ဆောင်နေလို့ ဖြစ်တယ်  ။

ဆရာဝန်တစ်ယောက်လို့ခေါ်ခြင်းဟာလည်း နာသောသူတွေကိုကုသပေးပြီး ၊ လူ့အသက်ကို ကြိုးစားအားထုတ်ပြီး ကယ်ဖို့ပြင်ဆင်လို့ပဲ ဖြစ်ပါတယ် ။

အဲ့လိုပဲ ဘုရားသားသမီးဖြစ်တဲ့ သင်ကရော ဘယ်အရာတွေကိုကြိုးစားလုပ်ဆောင်နေပါသလဲ ? 

ကျမ်းစာထဲမှာ အခုလို ဖော်ပြထားတယ် … 

“ဝိ​ညာဉ်​နှင့်​ကင်း​သော​ကိုယ်​သည် အ​သေ​ဖြစ်​သ​ကဲ့​သို့၊ အ​ကျင့်​နှင့်​ကင်း​သော ယုံ​ကြည်​ခြင်း​သည် အ​သေ​ဖြစ်၏။” ရှင်ယာကုပ်‬ ‭၂‬:‭၂၆‬

ဒါ သိပ်ကိုမှန်တယ် ။ ကျွန်မတို့ဟာ ဘုရားသားသမီးတွေ ဖြစ်ပြီး ဘုရားသားသမီးကဲ့သို့ အသက်ရှင်ဖို့တော့ လိုပါတယ်  …

ဘုရားရဲ့ သားသမီးတွေက -

• ဆုတောင်းခြင်း

• ဘုရားသခင်အကြောင်း ဝေငှခြင်း

• နှုတ်ကပါတ်တော်ဖတ်ရှုလေ့လာခြင်း

• ချီးမွမ်းကိုးကွယ်ခြင်း 

• ဝိညာဉ်ရေးရာ မိသားစုတွေနဲ့ ချိတ်ဆက် မိဿဟာယ ဖွဲ့ခြင်း စတဲ့ အရာများကို လုပ်ဆောင်တတ်ကြပါတယ် ။ 

သင်ကိုယ်တိုင်ရော ဒီအရာတွေ လုပ်ဆောင်ဖြစ်သလား မိတ်ဆွေ ရေ … 

စစ်မှန်တဲ့ ခရစ်တော်နောက်ကို လိုက်ကြတဲ့ သူတွေရဲ့ အသက်တာက ဘုရားသခင်ရဲ့ ကျေးဇူးတော်နဲ့ အကျင့်ပါသော ယုံကြည်ခြင်းကို ဟန်ချက်ညီညီ အသက်ရှင်တတ်သောသူတွေဖြစ်ပါတယ် ။ 

ဒါကြောင့်  မိတ်ဆွေ ရေ …

သင်ဟာ ဘုရားသခင်ရဲ့ ကျေးဇူးတော်ကို ခံယူခြင်း နဲ့ အကျင့်ပါသော ယုံကြည်ခြင်းကို ဟန်ချက်ညီညီ လုပ်ဆောင်တတ်ဖို့ ဘုရားသခင် အလိုတော်ရှိပါတယ် …. 

သင်ဟာ ကျေးဇူးတော်ကို အထူးခံစားရတဲ့သူဖြစ်တယ် 🤍