တစ်စုံတစ်ယောက် ခံစားနေရတဲ့အခါ ဒါမှမဟုတ် ဝမ်းနည်းနေတဲ့အခါ သူတို့ကို အားပေးချင်တာ သဘာဝပါပဲ။ စိတ်ချမ်းသာစေမယ့် စကားမျိုး ပြောပြချင်ကြပါတယ်။ အားတက်စေချင်ကြပါတယ်။ ဘဝဆိုတာ ခက်ခဲပါတယ်။ တစ်ခါတလေ ဘဝမှာ အလွန်တရာ ခက်ခဲတဲ့ ဒုက္ခတွေနဲ့ ကြုံရတဲ့အခါ ဘယ်သူ့ရဲ့ အားပေးမှုကိုမှ မခံယူချင်လောက်အောင် စိတ်ဓာတ်ကျနေတတ်ပါတယ်။ အဓိပ္ပာယ်ရှိတဲ့ ကျမ်းစာပိုဒ်တွေကလည်း သင့်နားထဲကို ရောက်လာချင်မှ ရောက်လာမှာပါ။ လူတွေက သင့်အတွက် အကောင်းဆုံး ဖြစ်စေချင်ကြပါတယ်။

ဒါဆိုရင် လတွေ၊ နှစ်တွေ၊ ဆယ်စုနှစ်တွေနဲ့ချီပြီး ဆုတောင်းချက်တွေ အဖြေမရဘဲ ဖြစ်နေတဲ့အခါ ဘယ်လိုလုပ်ရမလဲ။ ကျွန်ုပ်တို့ဟာ သင့်ကို စိတ်သက်သာရာ ရစေဖို့အတွက် အပေါ်ယံဆန်တဲ့ နှစ်သိမ့်စကားတွေနဲ့ ကျမ်းစာပိုဒ်တွေကို လာပြောတာ မဟုတ်ပါဘူး။ ဒီခက်ခဲနက်နဲတဲ့ အကြောင်းအရာရဲ့ အနှစ်သာရဆီကို တိုက်ရိုက် တိုးဝင်ကြည့်ရအောင်။

ဆုတောင်းခြင်းဆိုတာ ပြဿနာတွေကို အမြန်ဆုံး ဖြေရှင်းပေးတဲ့ နည်းလမ်းမဟုတ်ပါဘူး။ သင့်စိတ်ကို ခဏတာ ပျော်ရွှင်သွားစေဖို့ ဖန်တီးထားတဲ့အရာ လည်း မဟုတ်ပါဘူး။ ဆုတောင်းခြင်းဆိုတာ အသက်ရှင်တော်မူတဲ့ ဘုရားသခင်နဲ့ ဆက်သွယ်ခြင်း (သို့) မိဿဟာယ ဖွဲ့ခြင်းပဲ ဖြစ်ပါတယ်။ ကျမ်းစာထဲမှာ ယေရှုက ကျွန်ုပ်တို့ဟာ ဘုရားသခင်ရဲ့ သားသမီး၊ဘုရားသခင်ရဲ့ မိတ်ဆွေတွေလည်း ဖြစ်တယ်လို့ မိန့်ဆိုထားပါတယ်။

ဒါကြောင့် ဘုရားသခင်ထံ ချဉ်းကပ်တဲ့အခါ ကျွန်ုပ်တို့ရဲ့ ခံစားချက်တွေကို ဖွင့်ဟနိုင်ပါတယ်။ မျက်နှာဖုံးစွပ်စရာမလိုဘဲ မိမိရဲ့ ဟန်ဆောင်မှုမှန်သမျှကို ချွတ်ပစ်ပြီး ရိုးသားစွာ စကားပြောလို့ရတဲ့ အကောင်းဆုံး အခြေအနေမျိုးက ဒါမျိုးမဟုတ်လား။ အထူးသဖြင့် စိတ်ပျက်စရာတွေ၊ ဒေါသတွေ၊ မကျေနပ်ချက်တွေနဲ့ ဝမ်းနည်းပူဆွေးမှုတွေ အားလုံးနဲ့ ပတ်သက်လို့ပေါ့။ အခြေအနေတွေက တိုးတက်မလာသေးရင်တောင်မှ ကိုယ့်ရင်ထဲက ခံစားချက်တွေကို မျှဝေတာက အရေးကြီးသလို နှစ်သိမ့်မှုလည်း ဖြစ်စေပါတယ်။

ဒါပေမဲ့လည်း ဘုရားသခင်က ငါတို့ရဲ့အဲဒီလို ခံစားချက်တွေကို မကြားချင်ဘူးလို့ ကျွန်ုပ်တို့က အမြဲတမ်း ထင်နေတတ်ကြပါတယ်။ ငါတို့ရဲ့ ဒေါသနဲ့ နာကျင်မှုတွေကို ချုပ်တည်းထားဖို့ လိုတယ်လို့ ထင်တတ်ကြပါတယ်။ ဒါပေမဲ့ ကျွန်ုပ်တို့က ရိုးသားမှုမရှိဘဲ စစ်မှန်တဲ့ ခံစားချက်တွေကို မပြသဘူးဆိုရင် ဘုရားသခင်က ကျွန်ုပ်တို့ကို ဘယ်လို နှစ်သိမ့်ပေးနိုင်မှာလဲ။

အပြစ်ကင်းစင်ပြီး ဘုရားသခင်ရဲ့ သားတော်ဖြစ်တဲ့ ယေရှုတောင်မှ ဘာကြောင့် အဖြေမရတဲ့ ဆုတောင်းချက်မျိုး ရှိခဲ့ရတာလဲ။ ယေရှု လက်ဝါးကပ်တိုင်မှာ အသေခံရမယ့် နေ့မတိုင်မီ တစ်ညမှာ တပည့်တော်တွေကို ခေါ်ပြီး ဥယျာဉ်တစ်ခုမှာ ဆုတောင်းဖို့ ကြွသွားခဲ့ပါတယ်။ သူဟာ အလွန်တရာ စိတ်ဆင်းရဲပူပန်နေခဲ့ပါတယ်။ ရုပ်ပိုင်းဆိုင်ရာ ညှဉ်းပန်းနှိပ်စက်ခံရမှာနဲ့ သေဆုံးရမှာကို ကြောက်တာမဟုတ်ဘဲ၊ လူသားတွေရဲ့ အပြစ်အားလုံးအတွက် ကိုယ်စားခံယူရမယ့် ဒဏ်ခတ်မှုနဲ့ အဘဖြစ်တော်မူသော ဘုရားသခင်နဲ့ ကွဲကွာသွားရမယ့် နာကျင်မှုကို သူ သိနေလို့ ဖြစ်ပါတယ်။ ဒါကြောင့် "အဘ၊ ဤ​ခွက်​သည် အ​ကျွန်ုပ်​ကို​လွန်​သွား​နိုင်​လျှင် လွန်​သွား​ပါ​စေ​သော။" လို့ ဆုတောင်းခဲ့ပါတယ်။ (မဿဲ ၂၆:၃၉)

နောက်ဆုံး ယေရှု လက်ဝါးကပ်တိုင်ပေါ်မှာ အသေခံအနေစဉ်မှာ "အကျွန်ုပ်၏ဘုရားသခင်၊ အကျွန်ုပ်၏ဘုရားသခင်၊ အဘယ်ကြောင့် အကျွန်ုပ်ကို စွန့်ပစ်တော်မူသနည်း" လို့ အော်ဟစ်ခဲ့ပါတယ်။ (မဿဲ ၂၇:၄၆)

သင့်ရဲ့ ဆုတောင်းချက်ကို ဘုရားသခင် မဖြေကြားပေးဘူးလို့ ခံစားရရင်တောင်မှ အမှန်တရားကတော့ ယေရှုမှာ အဖြေမရခဲ့တဲ့ ဆုတောင်းချက် ရှိခဲ့ခြင်းအားဖြင့် ကျွန်ုပ်တို့ရဲ့ ဆုတောင်းသံတွေကို ဘုရားသခင် အမြဲတမ်း ကြားနာပေးမယ်ဆိုတာကို ဖော်ပြနေပြီး (ကျွန်ုပ်တို့ မျှော်လင့်ထားတဲ့ ပုံစံမျိုး မဟုတ်ရင်တောင်မှ) ကိုယ်တော် အမြဲတမ်း ဖြေကြားပေးမှာ ဖြစ်ပါတယ်။ ယေရှုဟာ ကောင်းကင်ဘုံရဲ့ စစ်မှန်တဲ့ တိတ်ဆိတ်မှုကို ကျွန်ုပ်တို့အတွက် ခံယူပေးခဲ့ပါပြီ။ ဘုရားသခင် စွန့်ပစ်ထားတယ်လို့ သင် ခံစားနေရရင်တောင်မှ တကယ်တမ်းမှာ သင်ဟာ တစ်ယောက်တည်း မဟုတ်ပါဘူး၊ ယေရှုနဲ့ရှိနေသမျှ ကာလပတ်လုံး သင် ဘယ်တော့မှ တစ်ယောက်တည်း ဖြစ်သွားမှာ မဟုတ်ပါဘူး။

ယေရှုဟာ ကျွန်ုပ်တို့ရဲ့ အရှင်သခင်နဲ့ ကယ်တင်ရှင် ဖြစ်တယ်ဆိုရင်၊ ကျွန်ုပ်တို့မှာ အသံထွက်ပြီး ပြောစရာ စကားလုံးတွေ မရှိတော့တဲ့ ဆုတောင်းချက်တွေကိုတောင် ဘုရားသခင် ကြားနာပေးတယ်ဆိုတာကို ကျွန်ုပ်တို့ စိတ်ချယုံကြည်နိုင်ပါတယ်။ ရောမဩဝါဒစာ ၈:၃၄ မှာ ယေရှုဟာ အဘဘုရားသခင်ရဲ့ လက်ယာတော်ဘက်မှာ ထိုင်လျက် ကျွန်ုပ်တို့အတွက် ကြားဝင်ဆုတောင်းပေးနေတယ်လို့ ဖော်ပြထားပါတယ်။ အဲဒါတင်မကသေးပါဘူး၊ ကျွန်ုပ်တို့အတွင်းမှာ သန့်ရှင်းသောဝိညာဉ်တော် ကိန်းဝပ်နေတယ်ဆိုရင် (ခရစ်ယာန်တိုင်းမှာ ရှိပါတယ်!) ဝိညာဉ်တော်ကလည်း ကျွန်ုပ်တို့အတွက် ကြားဝင်ဆုတောင်းပေးနေပါတယ်လို့ ရောမ ၈:၂၆ မှာ ဆိုထားပါတယ်။

စကော့တလန် လူမျိုး ဘာသာရေးပညာရှင်နဲ့ စာရေးဆရာ ပီ.တီ. ဖော်စစ် (P. T. Forsyth) က ဤသို့ ရေးသားခဲ့ဖူးပါတယ် - "တစ်နေ့ကျရင် ကျွန်ုပ်တို့ဟာ ကောင်းကင်ဘုံကို ရောက်သွားတဲ့အခါ ဘုရားသခင်ရဲ့ ငြင်းပယ်မှုကြီးတွေဟာ တစ်ခါတလေမှာ ကျွန်ုပ်တို့ရဲ့ ဆုတောင်းချက်တွေအတွက် အမှန်ကန်ဆုံး အဖြေတွေ ဖြစ်နေတယ်ဆိုတာကို ကျေးဇူးတင်စွာနဲ့ သိရှိလာကြရပါလိမ့်မယ်။"

ကောင်းကင်ဘုံက တိတ်ဆိတ်နေတယ်လို့ တစ်ခါတလေ ခံစားရတာ သင့်တစ်ယောက်တည်း မဟုတ်ပါဘူး။ ကျွန်ုပ်တို့ မြင်ခဲ့ရတဲ့အတိုင်း ယေရှုကိုယ်တိုင်လည်း ဒါကို ခံစားခဲ့ရဖူးပါတယ်။ ဒီလိုခံစားချက်နဲ့ သင် တစ်ယောက်တည်း ရုန်းကန်နေစရာ မလိုပါဘူး။ သင့်ပတ်ဝန်းကျင်မှာ ဘုရားသခင်နဲ့ ရင်းနှီးတဲ့ ဆက်ဆံရေးရှိတဲ့သူတွေကို သိရင် အကူအညီတောင်းပါ။ ဘုရားသခင်နဲ့ ဆက်သွယ်ချင်တဲ့ သင့်ရဲ့ဆန္ဒကို မျှဝေပါ။ သူတို့ကို သင့်အတွက် ဆုတောင်းပေးဖို့ တောင်းဆိုပါ၊ ဒါမှမဟုတ် သင် ယုံကြည်ရတဲ့သူတွေဆိုရင် အတူတူ ဆုတောင်းဖို့ ပြောပါ။ သူတို့ရဲ့ သက်သေခံချက်တွေကလည်း သင့်ကို မျှော်လင့်ချက် ရှိစေပါလိမ့်မယ်။ ဘယ်လိုဆုတောင်းချက်မျိုးကိုမှ ကျွန်ုပ်တို့ မတောင်းရသေးရင်တောင်မှ ဘုရားသခင်က ကျွန်ုပ်တို့ရဲ့အသံကို နားညောင်းနေဆဲ ဖြစ်ပါတယ်။ ယေရှုက သင့်ရဲ့ ခံစားချက်ကို နားလည်ပြီး သင့်ရဲ့ ဆုတောင်းချက်တွေကို အဖဘုရားဆီကို တင်ပြပေးနေပါတယ်။

အဲဒီအချက်ကို ယုံကြည်ပါ။ လက်မလျှော့လိုက်ပါနဲ့။ ကောင်းကင်ဘုံက တိတ်ဆိတ်နေသလို ထင်ရရင်တောင်မှပေါ့။